Fréttasafn

Þjónustukönnun meðal íbúa og aðstandenda Hrafnistuheimilanna og viðhorfskönnun meðal þjóðarinnar

Lesa meira...

 

Síðastliðið vor framkvæmdi Hrafnista viðamikla þjónustukönnun á meðal íbúa og aðstandenda í samstarfi við Prósent sem er þekkingarfyrirtæki á sviði markaðsrannsókna. Könnunin meðal íbúa var framkvæmd með einkaviðtölum og var þátttaka tæp 90% af úrtakinu. Könnunin meðal aðstandenda fór fram með netkönnun sem send var í tölvupósti og var svarhlutfall 48% af úrtakinu. Að auki var framkvæmd viðhorfskönnun meðal þjóðarinnar um viðhorf þeirra til hjúkrunarheimila og heilbrigðismála þeim tengt sem fór fram með netkönnun. Tilgangurinn með þjónustukönnunni var að gefa stjórnendum og starfsmönnum Hrafnistu innsýn í líðan og upplifun íbúa Hrafnistuheimilanna til þess að geta séð hvað vel er gert og hvað megi gera betur. Auk þess að fá fram viðhorf aðstandenda og almennings til hjúkrunarheimila og þeirrar þjónustu sem þar er veitt. Álíka viðamikil viðhorfs- og þjónustukönnun hefur ekki áður verið gerð á hjúkrunarheimilum hér á landi og eru þær upplýsingar sem fengust með henni mjög mikilvægar í gæða- og umbótastarfi Hrafnistu. 

Niðurstöður könnunarinnar gefa til kynna að um helmingur almennings sem tók þátt í könnuninni var mjög eða frekar jákvæður gagnvart hjúkrunarheimilum Hrafnistu og eru þær niðurstöður í samræmi við viðhorf almennings til annarra hjúkrunarheimila sem komu að framkvæmd könnunarinnar. Samkvæmt niðurstöðum könnunarinnar telur almenningur að ríkið þurfi að standa sig betur þegar kemur að málefnum hjúkrunarheimila og að auka þurfi fjárframlög til þeirra.

Niðurstöður könnunarinnar gefa til kynna að íbúar á Hrafnistuheimilunum séu almennt ánægðir með hjúkrunarheimilið sem þeir búa á og meta lífsgæði sín betri á hjúkrunarheimilinu en ef þeir byggju enn heima og er það einnig upplifun aðstandenda. Íbúar Hrafnistu upplifa öryggi á heimilinu, umhyggju frá starfsfólki og að þörfum þeirra sé mætt.

Þetta eru mjög ánægjulegar niðurstöður og hvetjandi fyrir stjórnendur og starfsfólk Hrafnistuheimilanna. Niðurstöður þjónustukönnunarinnar gefa okkur einnig upplýsingar um það hvað má gera betur í þjónustu á Hrafnistuheimilunum og verða niðurstöðurnar nýttar í umbótastarfi á Hrafnistu.

 

Lesa meira...

Sumarauki í september

Lesa meira...

 

Það hefur heldur betur viðrað vel síðustu daga og hefur þessi sumarauki í september verið vel nýttur hér utandyra hjá okkur á Hrafnistuheimilunum og starfið verið meira og minna flutt út undir beran himinn. Íbúar á Hrafnistu í Skógarbæ huguðu að kartöfluuppskeru á meðan aðrir stunduðu stólaleikfimi, fóru í göngutúra, skelltu sér í dansleikfimi, spiluðu Kubb eða bara nutu þess að vera úti í góða veðrinu.

Meðfylgjandi myndir voru teknar á Hrafnistuheimilunum þessa síðsumars blíðviðrisdaga.

 

Lesa meira...

Árlegt sumargrill á Hrafnistu Laugarási

 

Árlegt sumargrill var haldið út í garði á Hrafnistu Laugarási í hádeginu í dag. Matreiðslumenn elduðu grillkjöt ofan í mannskapinn og sólin skein á meðan íbúar gæddu sér á grillmat með öllu tilheyrandi.

Regína Ósk og Svenni tóku lagið fyrir íbúa og starfsfólk sem nutu sín vel úti í veðurblíðunni í dag.

 

Lesa meira...

Árlegt sumargrill á Hrafnistu Hraunvangi

Lesa meira...

Árlegt sumargrill var haldið í hádeginu föstudaginn 12. ágúst sl. á Hrafnistu Hraunvangi með tilheyrandi grillmat og ýmsu meðlæti. Vinir Ragga Bjarna, þeir Þorgeir Ástvalds, Björgvin Franz og Ásgeir Páll héldu uppi stuðinu eftir borðhaldið og þá var sungið og dansað.

Guðni Gíslason ljósmyndari Fjarðarfrétta kíkti við og tók nokkrar myndir.

 

Lesa meira...

Framkvæmdastjóri Sjómannadagsráðs lætur af störfum

Lesa meira...

 

Á fundi sínum fyrr í dag féllst stjórn Sjómannadagsráðs á beiðni framkvæmdastjóra síns, Sigurðar Garðarssonar, um að láta af störfum. Voru honum jafnframt færðar þakkir fyrir farsælt starf um langt árabil við stjórnvöl þeirrar umfangsmiklu starfsemi sem SDR stendur fyrir, einkum á sviði uppbyggingar hjúkrunarheimila Hrafnistu og reksturs eigna Sjómannadagsráðs og leiguíbúða Naustavarar. Eru Sigurði færðar bestu óskir um velgengni í nýjum viðfangsefnum sínum. Aríel Pétursson, formaður stjórnar Sjómannadagsráðs, mun taka við hlutverki Sigurðar í daglegum rekstri þar til nýr framkvæmdastjóri hefur verið ráðinn.

Sigurður Garðarsson: „Ég kveð þennan vinnustað og framúrskarandi samstarfsfólk á liðnum árum með söknuði en er jafnframt sannfærður um að þetta er rétti tímapunkturinn til þess að söðla um og beina þeirri reynslu og þekkingu sem ég hef öðlast, í nýja farvegi á nýjum slóðum sem mig langar að feta. Sjómannadagsráð sinnir gríðarlega mikilvægu starfi í íslensku samfélagi og ég lít stoltur um öxl yfir farinn veg í stjórnunarhlutverki á því sviði.“

Aríel Pétursson: „Sjómannadagsráð sýnir þessari ákvörðun Sigurðar fullan skilning og hefur í samráði við hann ákveðið að starfslokin taki þegar gildi. Það eru miklar nýjar áskoranir í verkefnum okkar og með nýju fólki koma eins og alltaf nýjar hugmyndir og áherslur. Við bjóðum þær einfaldlega velkomnar um leið og við þökkum Sigurði hans vel unnu störf fyrir Sjómannadagsráð í þágu okkar og aldraðs fólks á Íslandi.“

Sjómannadagsráð rekur starfsemi sína á ríflega 100 þúsund fermetrum í fimm sveitarfélögum. Íbúar á Hrafnistuheimilunum eru um 800 talsins auk um 350 annarra íbúa í leiguíbúðum SDR og talsverðs fólks í eigin íbúðum í nágrenni þjónustukjarnanna. Félagið veitir um 1.700 manns atvinnu og veltir ríflega13 milljörðum króna á ári.

 

 

Lesa meira...

Árlegt sumargrill á Hrafnistu Sléttuvegi

Lesa meira...

 

Það var heldur betur fjör í hádeginu í gær þegar hið árlega sumargrill fór fram á Sléttunni Hrafnistu Sléttuvegi.Boðið var upp á grillkjöt með öllu tilheyrandi ásamt ís í eftirrétt. Tónlistamaðurinn Hörður G. Ólafsson spilaði létta tóna undir borðhaldi og hélt síðan uppi fjörinu og skemmti af sinni alkunnu snilld eftir borðhaldið.

 

Lesa meira...

Nýr verkefnastjóri á heilbrigðissviði Hrafnistu

Lesa meira...

 

Kolbrún Sif Marinósdóttir hefur verið ráðin verkefnastjóri á heilbrigðissvið Hrafnistu. Kolbrún Sif mun hafa umsjón með tannhirðu og munnheilsu íbúa Hrafnistuheimilanna. Hún er menntaður tanntæknir frá Heilbrigðisskólanum við Ármúla og útskrifaðist þaðan árið 2007. Síðan þá hefur hún unnið hjá munn- og kjálkaskurðlækni, barnatannlækni og við almennar tannlækningar. Kolbrún hefur einnig unnið á Hrafnistu Hraunvangi við umönnun.

 

 

 

 

 

 

 

 

 

Lesa meira...

87 nýjar íbúðir við lífsgæðakjarna Sléttunnar

Lesa meira...

 

Hafinn er lokaáfangi uppbyggingar leiguíbúða fyrir 60 ára og eldri sem tengjast þjónustumiðstöðinni Sléttunni við Sléttuveg í Reykjavík. Við Skógarveg rísa tvö ný fjölbýlishús með 87 íbúðum sem eru hluti af lífsgæðakjörnum Sjómannadagsráðs, Naustavarar og Hrafnistu.

Aríel Pétursson, formaður Sjómannadagsráðs og Dagur B. Eggertsson borgarstjóri í Reykjavík voru viðstaddir þegar að Guðbjörn Guðjónsson gröfumaður hjá undirverktaka Þarfaþings tók fyrstu skóflustunguna vegna framkvæmdanna sl. föstudag að viðstöddum aðstandendum framkvæmdanna.

Uppbygging lífsgæðakjarnans er samstarfsverkefni Sjómannadagsráðs, Reykjavíkurborgar og ríkisins. Framkvæmdir annast Þarfaþing hf. sem skilar íbúðunum fullbúnum til Naustavarar og er ætlað að því verði lokið seinni hluta ársins 2024.

Sjómannadagsráð hefur þegar til útleigu í gegnum dótturfyrirtæki sitt, Naustavör, 60 íbúðir við Sléttuveg 27. Verða því alls 147 íbúðir fyrir þennan aldurshóp til útleigu í lífsgæðakjarnanum að framkvæmdum loknum. Gæði og búnaður íbúðanna verður sambærilegur og í núverandi íbúðum við Sléttuveg. Innangengt er úr öllum húsunum í þjónustumiðstöð á Sléttuvegi. Auk þess annast dótturfélagið Hrafnista rekstur hjúkrunarheimilis með 99 íbúðum auk þjónustumiðstöðvarinnar Sléttunnar sem er samstarfsverkefni með öðrum félagsmiðstöðvum eldri borgara í Reykjavík.

Hugmyndafræði lífsgæðakjarnans er fædd hjá Sjómannadagsráði og hefur þar verið í þróun í áratugi. Hún gengur út á að reka samhliða hjúkrunarheimili, leiguíbúðir og þjónustumiðstöðvar þar sem eldra fólki eru búnar aðstæður til að hámarka lífsgæði sín.

„Afar ánægjulegt er að geta með samhentu átaki Sjómannadagsráðs, Reykjavíkurborgar og ríkisins, stuðlað að jafn víðtækri uppbyggingu leiguíbúða fyrir aldraða. Framkvæmdin endurspeglar hvernig slíkt samstarf stuðlar að meiri lífsgæðum og hraðari uppbyggingu, fremur en að hver vinni í sínu horni,“ segir Sigurður Garðarsson, framkvæmdastjóri Sjómannadagsráðs og Naustavarar.

Nýjar íbúðir Naustavarar verða í tveimur samtengdum húsum við Skógarveg 4 og 10. Íbúðirnar eru ýmist tveggja eða þriggja herbergja á bilinu 54 til 90 fermetrar, en þrjár íbúðir verða um 120 fermetrar að stærð. Í íbúðunum er allt aðgengi gott og þær sérhannaðar með þarfir eldra fólks í huga. Hurðaop og gangar eru breiðari en gengur og gerist, einnig eru baðherbergi og eldhús sérhönnuð svo auðvelt sé að nota ýmiss konar stuðningstæki. Reiknað er með að fyrstu íbúðirnar verði tilbúnar til afhendingar um mitt árið 2024.

Undir báðum húsum verður ein stór bílageymsla þar sem stæði verða leigð út sérstaklega. Einnig verða útistæði við húsin og þar verða föst stæði einnig leigð út til íbúa með sama fyrirkomulagi og í leiguíbúðunum sem eru við Sléttuveg.

Meðfylgjandi eru tölvugerðar myndir af nýju húsunum, auk mynda frá athöfn sl. föstudag þegar tekin var skóflustunga við upphaf framkvæmdanna.

Frekari upplýsingar veita:

Aríel Pétursson, formaður Sjómannadagsráðs. 775-0466 / This email address is being protected from spambots. You need JavaScript enabled to view it.

Sigurður Garðarsson framkvæmdastjóri Sjómannadagsráðs og Naustavarar. 892-1771 / This email address is being protected from spambots. You need JavaScript enabled to view it.

Um Naustavör og Sjómannadagsráð:

Naustavör er óhagnaðardrifið leigufélag sem var stofnað árið 2001 í þeim tilgangi að byggja, og bjóða upp á sérútbúið húsnæði, með aðgengi að þjónustu og afþreyingu sem hentar sérstaklega vel fólki frá 60 ára aldri. Myndi félagið hagnað er honum varið í frekari uppbyggingu á aðstöðu og þjónustu en arður er ekki greiddur til eigenda. Naustavör er í eigu Sjómannadagsráðs og er eitt af helstu hlutverkum Sjómannadagsráðs að vera leiðandi í öldrunarþjónustu á landinu. Hjúkrunarheimili Hrafnistu eru einnig í eigu Sjómannadagsráðs og er gott samstarf á milli Naustavarar og Hrafnistu, enda eru allar leiguíbúðirnar í næsta nágrenni við Hrafnistuheimilin. Gott aðgengi er innanhúss á milli íbúðanna og hjúkrunarheimilanna.

Sjá einnig:www.naustavor.is og www.slettan.is

 

Lesa meira...

Föstudagsmolar 12. ágúst 2022 - Gestahöfundur er Rebekka Ingadóttir, forstöðumaður Hrafnistu Skógarbæ og Hrafnistu Boðaþingi

Lesa meira...

 

Sumarfríið á enda
Ég er nýkomin úr sumarfríi og mikið óskaplega var gott að fara í frí með fólkinu sínu og hlaða batteríin. Ég nefndi það við nokkra áður en ég fór í fríið að ég hafi aldrei verið jafn spennt að fara í frí eins og þetta sumarið. Ástæðan fyrir því tel ég vera sú að síðastliðinn vetur var krefjandi, erfiður, verkefni sem tengdust covid tóku auka orku frá okkur en mikið svakalega stóðum við okkur öll vel. Klapp á bakið til okkar allra. Ég náði svo sannarlega að hlaða batteríin í fríinu þar sem ég ferðaðist um landið með fjölskyldunni minni og dásamlegu vinum okkar. Ég var umvafin náttúrunni sem gefur manni orku og minnir mann sífellt á hvað við búum í stórkostlegu landi. Þegar þessi pistill fer í loftið er ég nýkomin úr gönguferð að Grænahrygg með vinkonuhópnum mínum frá því í menntaskóla. Svei mér þá ef þetta sumarfrí er ekki bara uppá 10 og ég vona að allir starfsmenn Hrafnistu hafi náð að hlaða batteríin eins og ég.

Lækna- og hjúkrunarnemar í sumarstörfum
Í sumar hef ég verið svo lánsöm að kynnast og vinna með lækna- og hjúkrunarnemum sem starfa í Skógarbæ og í Boðaþingi. Nemarnir koma til starfa eftir vorprófin og vinna ýmist með hjúkrunarfræðingum á vöktum eða með hjúkrunarfræðing á bakvakt, allt eftir því hvar þeir eru staddir í náminu. Margir af þessum nemum hafa unnið á heimilunum með skóla í vetur og þá unnið kvöld og helgarvaktir. Í sumar höfðu þeir tök á að vinna einnig dagvaktir og fá þannig aðra sýn á starfið þar sem að á daginn eru unnin fleiri rútínubundin verkefni. Þar sem ég vinn að öllu jafna bara á virkum dögum var ég því svo lánsöm að kynnast þeim betur þetta sumarið. Allt eru þetta harðduglegir nemar sem eiga eftir að standa sig vel í sínum störfum í framtíðinni. Þeir eru sjálfstæðir, sýna ábyrgð en um leið leita þeir til fagfólks og fá ráðleggingar þegar þess þarf. Það að koma í sumarstörf á Hrafnistu mun gefa nemunum mikið í lærdóms-bakpokann. Öll samskiptin við samstarfsfólk, íbúa, aðstandendur og aðra þjónustuþega Hrafnistu getur maður nefnilega ekki lært inni í skólastofu heldur er mikilvægt að læra í aðstæðunum. Ég hvet ykkur sem eruð að byrja í heilbrigðistengdu námi í haust að sækja um störf á Hrafnistu næsta sumar og fá þannig ómetanlega reynslu sem á eftir að reynast ykkur vel í framtíðinni.

Haustið og verkefnin framundan
Haustið er uppáhalds tíminn minn hvað varðar starfsárið á Hrafnistu. Allir koma úthvíldir eftir sumarfrí, nýjir starfsmenn bætast jafnvel við í hópinn okkar og allir til í allt einhvern veginn. Verkefnin framundan eru fjölbreytt og skemmtileg. Í Skógarbæ erum við að taka húsnæðið í gegn og erum strax farin að sjá mun. Skógarbær er gamalt húsnæði sem hefur ekki fengið nægt viðhald á síðustu árum og því eru verkefnin stór og mörg. Eitt skref í einu og þá komumst við einhvern tímann á leiðarenda.

Ég hlakka til að hitta ykkur öll, sólbrún, úthvíld og tilbúin í haustið sem mun vonandi færa okkur skemmtileg verkefni sem við vinnum saman. Svo fer að styttast í árshátíð……………það verður nú eitthvað.

Eigið góða helgi!

Rebekka Ingadóttir, forstöðumaður Hrafnistu Skógarbæ og Hrafnistu Boðaþingi.

Myndin sem fylgir molanum er tekin á Hvestu á Vestfjörðum í júlí.

 

Lesa meira...

Síða 1 af 163

Til baka takki