Hugmyndafræði

Fullyrða má að Hrafnistuheimilin hafi breytt kjörum og lífsviðhorfum aldraðra í þjóðfélaginu og stuðlað að ánægjulegu ævikvöldi þeirra. Með hækkandi lífaldri og fjölgun aldraðra í þjóðfélaginu er mikilvægt að efla þjónustu Hrafnistu enn frekar. Enda er eitt af aðalmarkmiðum Hrafnistu að vera leiðandi aðili í þjónustu og umönnun aldraðra einstaklinga. Hrafnista hefur markvisst verið að byggja upp sem flesta þætti er lúta að þarfa- og þjónustustigi aldraðra. Lífsgæði þeirra eru í öndvegi og jákvæðni, ánægja og alúð eru atriði sem stjórnendur og starfsmenn vilja að einkenni þeirra þjónustu.

Markmið

Markmið Hrafnistu snúa bæði að innra og ytra starfi heimilanna en Hrafnista setur sér það markmið að vera leiðandi í umönnun og þjónustu við aldraða. Að stuðla að andlegri, líkamlegri og félagslegri vellíðan heimilisfólks. Að efla faglega þekkingu starfsfólks. Að auka starfsánægju og bæta starfsumhverfi starfsfólks.

Framtíðarsýn

Stjórn Sjómannadagsráðs setur sér það sem framtíðarmarkmið að Hrafnista verði leiðandi aðili í þjónustu og umönnun aldraðra. Framtíðarsýnin byggir á uppbyggingu íbúða- og lífsgæðakjarna sem kemur til móts við sem flest þarfa- og þjónustustig fyrir aldraða. Hrafnista framtíðarinnar mun verða fyrirtæki sem vinnur að umönnun og þjónustu við aldraða. Fyrirtæki Sjómannadagsráðs munu samnýta þjónustu- og rekstrarþætti.

Með þessari framtíðarsýn stefnir Hrafnista að því að víkka út og stækka markhóp sinn og fá á íbúða- og þjónustusvæði Hrafnistu aðila sem ekki eru ennþá komnir á það stig þjónustu að þurfa mikla umönnun og hjúkrunarþjónustu.

Markvisst verður unnið að uppbyggingu jákvæðrar ímyndar um þá starfsemi og þjónustu sem innt er af hendi hjá Hrafnistu.