Hrafnista Laugarás í Reykjavík tók til starfa árið 1957 og er í eigu Sjómannadagsráðs.
Á heimilinu eru hjúkrunarrými fyrir 190 íbúa og hvíldargesti þar sem veitt er sólarhrings hjúkrunar- og læknisþjónusta.
Inntaka íbúa á Hrafnistu Laugarás fer fram í gegnum Færni- og heilsumatskerfi Landlæknisembættisins.
Um hvíldarrými er sótt um í gegnum Embætti Landlæknis. Hvíldarinnlögn er tímabundin dvöl í hjúkrunarrými. Markmið þjónustunnar er að gera öldruðum kleift að búa lengur á eigin heimili með því að viðhalda og auka lífsgæði þeirra með markvissu starfi og með því að veita aðstandendum stuðning og ráðgjöf. Meðan á hvíldarinnlögn stendur er lögð rík áhersla á styrkingu líkamlegra, andlegra og félagslegra þátta. Í hvíldarinnlögn njóta gestir allrar almennrar þjónustu sem Hrafnista býður íbúum heimilisins, þar með talið að taka þátt í almennu félagsstarfi og þeim viðburðum sem í boði eru.
Önnur skammtímarými á Hrafnistu Laugarási eru dagendurhæfing og dagþjálfun fyrir einstaklinga með heilabilun.
Allar nánari upplýsingar um Hrafnistu í Laugarási má finna í Handbókin þín - íbúar og aðstandendur
Þeir sem óska eftir frekari upplýsingum um heimilið er bent á að hafa samband við Unni Stefánsdóttur í símatíma á mánudögum, þriðjudögum og miðvikudögum milli kl. 11-12 í síma 693 9558 eða í netfangið unnur.stefansdottir[hja]hrafnista.is
Lífsgæðakjarni
Lífsgæðakjarni nær yfir bæði húsnæði og þjónustu þar sem fólki gefst kostur á að auka lífsgæði sín og njóta þess að vera til. Á Hrafnistu Laugarási er að finna litla verlsun, hárgreiðslustofu, fótaaðgerðarstofu, kaffihús, matsölu o.fl. Á lóð heimilisins, við Brúnaveg 9, eru 24 leiguíbúðir í eigu Naustavarar, dótturfélags Sjómannadagsráðs. Íbúar í leiguíbúðunum geta sótt ýmiskonar viðburði og skemmtanir á Hrafnistu í gegnum aðild að DAS klúbbnum. Tengigangur er á milli íbúðanna á Brúnavegi 9 og Hrafnistu í Laugarási.
Aðstaðan
Mikil áhersla er lögð á að skapa heimilislegar aðstæður og er það m.a. gert með því að opna aðgengi og afnot að sameiginlegum rýmum fyrir íbúa og aðstandendur.
Kaffihús
Eins og frægt er orðið var opnað kaffihús á Hrafnistu árið 2012 með mikilli viðhöfn. Með breytingunni var skapað hlýlegt bókakaffisumhverfi í sambland við hefðbundinn matsal sem þjónar bæði heimilisfólki, starfsfólki og gestum Hrafnistu.
Kaffihúsið, sem fékk nafnið Skálafell, er opið til kl 18.00 á kvöldin. Þar er hægt að kaupa kaffidrykki og meðlæti. Heimilismönnum gefst þar tækifæri til að sækja kaffihús og bjóða vinum og ættingjum með sér. Líkt og á flestum kaffihúsum landsins er mögulegt að fá sér þar léttvín eða bjór.
Verkstjóri í Skálafelli og yfirmaður kaffihússins er Auður Björk Bragadóttir audur.bragadottir[hja]hrafnista.is
