Félagar í Lionsklúbbi Hafnarfjarðar hafa undanfarin ár stutt dyggilega við starfsemi Hrafnistu í Hafnarfirði með veglegum gjöfum.
Aðallega er það sjúkraþjálfunin sem notið hefur góðs af en henni hafa þeir gefið ófá afar fullkomin tæki til þjálfunar og meðferðar á þjónustuþegum deildarinnar. Nýlega komu þeir færandi hendi og afhentu deildinni fjölþjálfa, teg. Tr 4 að andvirði kr. 900.000- en áður höfðu þeir gefið annan sambærilegan. Tækin sem sjúkraþjálfun Hrafnistu Hafnarfirði hefur fengið með þessum hætti auka mikið á þjálfunarúrræði og afkastagetu deildarinnar þannig að unnt er að veita breiðari hóp viðeigandi meðferð.
Þessir heiðursmenn hafa einnig gefið Hrafnistu í Hafnarfirði aðrar gjafir. Má þar nefna sérlega vandað ferðarúm sem aðstandendur geta nýtt sér, spariborðbúnað fyrir 40 manns og nú síðast nýjan hjartarita ásamt peningagjöf til bókasafns heimilisins. Þessar gjafir eru kærkomin búbót á stóru heimili þar sem sífelld endurnýjun og aukning á búnaði er nauðsynleg.
Félagar í Lionsklúbbi Hafnarfjarðar eiga svo sannarlega heiður skilinn fyrir ómetanlegt framlag í þágu eldri borgara með gjöfum sínum til heimilisins.
Myndirnar eru frá mótttöku sem haldin var í mars s.l. á Hrafnistu Hafnarfirði í þakklætisskyni fyrir gjafirnar.
Bryndís Fanný Guðmundsdóttir, sjúkraþjálfari.