Top header icons

Fyrir starfsfólk
Örugg skjalamótttaka Örugg skjalamótttaka Fyrir starfsfólkHrafnista á Facebook

 
 
 
 

Föstudagsmolar 11. nóvember 2022 - Gestahöfundur er Valgerður K. Guðbjörnsdóttir, forstöðumaður Hrafnistu Sléttuvegi

Samskipti og vellíðan

Við eyðum stórum hluta af sólarhringnum með vinnufélögum okkar og því er það mjög mikilvægt að okkur líði vel í vinnunni.

Það er ekki sjálfgefið að það sé gaman að mæta í vinnuna og eigum við öll misjafna daga. Sjálfri finnst mér gaman að mæta í vinnu og takast á við öll þau fjölbreyttu verkefni sem koma upp á hverjum degi. Enginn dagur er eins, nóg að gera og ég á góða og skemmtilega vinnufélaga. Mér finnast það forréttindi að fá að vinna með góðu fólki og inni á heimili þeirra sem byggðu landið okkar.

Nú er haustið liðið og veturinn komin, haustið hefur verið ansi skrautlegt hjá okkur og höfum við notað tækifærið til að lita það hinum ýmsu litum með því að taka þátt í hinum ýmsu uppákomum. Haustfagnaðurinn hjá okkur var í september með miklu húllum hæi, mikið var að gera í kringum árshátíð starfsmanna sem haldin var um miðjan október og þó hún hafi verið fyrir starfsmenn þá urðu íbúarnir mikið varir við hvað var um að vera og hlökkuðu til með okkur starfsfólkinu. Bleiki dagurinn var tekinn með trompi hjá okkur bæði meðal starfsmanna og íbúa. Októberfest var haldið með pompi og prakt. Starfsmenn klæddu sig í búninga við hæfi og boðið var upp á bjór, pretzel og dans. Ekki má gleyma Halloween sem hefur verið að ryðja sér til rúms í íslenskum hefðum. Starfsmenn tóku að sjálfsögðu þátt í þeim degi með því að klæða sig í allra kvikinda líki, íbúum og öðrum gestum til mikillar ánægju. En fjörið er ekki enn á enda og ætlum við að halda marga viðburði og skemmtanir út þetta ár, sem dæmi má nefna kótilettudaginn, jólabjórsdag, jólabasar, jólaball og margt fleira.  Við höfum fengið að heyra það utan úr bæ að það sé alltaf fjör á Sléttuveginum. Þetta er allt liður í að halda góðum starfsanda og stuðla að félaglegri vellíðan íbúanna okkar og gesta.

Hrafnista er fyrst og fremst þjónustufyrirtæki en fólk gerir mismunandi kröfur um þjónustu, bæði íbúar, aðstandendur og aðrir þjónustuþegar en það sem skiptir allflesta miklu máli er framkoma og viðhorf starfsfólks. Við vitum öllum hvernig okkur líður þegar við mætum starfsmanni sem er með bros á vör, okkur finnst við velkomin og líður vel. Það að brosa og bjóða góðan daginn fyllir fólk vellíðan og öryggi og því finnst það vera velkomið. Bros er samnefnari fyrir góða þjónustu í  þjónustufyrirtækjum.

Það er mikilvægt að hugsa til þess að það erum við sjálf sem ákveðum hvernig starfsandinn er á okkar vinnustað. Sýnum hvert öðru umburðarlyndi, virðingu og jákvætt viðmót í öllum samskiptum. Tölum saman og vinnum saman sem ein liðsheild að sameiginlegum markmiðum. Við stjórnendur á Sléttuvegi fórum í vinnu og settum okkur markmið sem við viljum viðhalda. Við rifjum þau markmið upp saman reglulega og reynum að láta þau koma fram í samskiptum okkar. Mig langar að deila þeim markmiðum með ykkur hinum en þau markmið tóna vel við þau markmið sem Hrafnista hefur sett fyrir heimilin sín í heild. Markmið okkar er að vinna að góðum samskiptum, starfsanda og samstarfi og viðhalda ástríðu og gleði til þess að lífsgæðakjarninn blómstri fyrir stjórnendur, starfsfólk, íbúa, aðstandendur og aðra gesti.

Góður starfsandi eykur starfsánægju og gerir Hrafnistu að stað sem er gott og eftirsóknavert að búa, vinna og heimsækja.

Vonandi eigið þið dásamlega helgi hvar sem þið eruð stödd.

Valgerður K. Guðbjörnsdóttir, forstöðumaður Hrafnistu Sléttuvegi.

 

 

Til baka takki

Þessi vefsíða notar kökur (cookies). Með því að halda áfram að nota vefinn, samþykkir þú þessa virkni vefsins.
Samþykkja kökur