Föstudagsmolar

Maí er runninn upp, einn af mínum uppáhalds mánuðum, gróðurinn að taka við sér, bjartar nætur, fuglar undirbúa hreiðurgerð, sauðburður og stangveiði. Allir spenntir að fara í sumarfrí eftir langan og strangan vetur og elsku frábæra sumarstarfsfólkið okkar mætir eins og ferskur sumarblær inn á vinnustaðinn.

Það er ekki hægt að neita því að veturinn hjá okkur á Hraunvangi var harla óvenjulegur, framan af vorum við ýmist að draga úr regluverkinu sem fylgdi Covid eða bæta í. Í tvö ár gátum við komið í veg fyrir að íbúar okkar smituðust af Covid, en svo kom skellurinn – fjöldi íbúa og starfsmanna fengu veiruna skæðu. Það sem var magnað á þessum tíma var að sjá samstöðuna og drifkraftinn í starfsmannahópnum okkar, allir lögðu sig fram við að láta hlutina ganga upp og fyrir það er ég óendanlega þakklát.

Frá því í haust hefur verið mikið um framkvæmdir á Hraunvangi, búið að fara í mikla upplyftingu á rýmum í A álmu, skipt var um fataskápa, innréttingar, hreinlætistæki, málað o.fl. Eins hefur verið hresst upp útlit miðrýma, málað og húsgögn endurnýjuð. Þessar framkvæmdir reyna á alla aðila, ekki síst íbúana okkar, það ber að þakka öllum hlutaðeigandi aðilum fyrir þá þolinmæði og skilning sem þau hafa sýnt á meðan framkvæmdum stendur.

Það eru spennandi tímar framundan hjá okkur en eins og gefur að skilja hafa mörg verkefni verið sett á bið síðustu tvö ár en nú getum við loksins haldið áfram og það sem er ánægjulegast er að mega aftur hittast og eiga skemmtilegar stundir. Síðastliðinn föstudag hélt starfsmannafélag Hrafnistu í Hafnarfirði vorfögnuð þar sem boðið var upp á flottan mat í glæsilega skreyttum sal, skemmtiatriði og hljómsveit lék undir dansi – þvílíkt fjör. Gleði skein úr andliti allra og kvöldið einstaklega vel heppnað hjá þessum samhenta hópi starfsmanna.  

En sjálf ætla ég nú að taka mér viku frí og skella mér í sauðburð, það eru forréttindi að geta farið á sitt æskuheimili í sveitinni og geta tekið þátt í sauðburði, fyrir þá sem ekki hafa prufað þá mæli ég með því, það er ekki hægt að finna betri leið til að vera í núvitund og slaka á.

Góða helgi og njótið sumarsins öll sem eitt.

Árdís Hulda Eiríksdóttir

forstöðumaður, Hrafnistu Hraunvangi.