Fréttasafn

Starfsmaður íbúðaleigufélagsins Naustavarar, dótturfélags Sjómannadagsráðs, sem þjónustar m.a. Hrafnistu, greindist um helgina með Covid-19 smit og er viðkomandi nú í einangrun. Samkvæmt fyrirmælum rakningarteymis Almannavarna ber þeim sem voru í mikilli nálægð (innan tveggja metra) við viðkomandi, í meira en 15 mín frá og með síðastliðnum föstudegi, að fara í sóttkví og hefur nú þegar verið haft samband við alla hlutaðeigandi. Af þeim sökum er skrifstofa Naustavarar og Sjómannadagsráðs við Brúnaveg 9 lokuð vegna sóttkví starfsmanna.* Auk þess eru tveir starfsmenn á stoðdeild Hrafnistu Hraunvangi í Hafnarfirði, sem viðkomandi hitti á föstudag, farnir í sóttkví. Að öðru leyti hefur tilfellið ekki áhrif á starfsemi Hrafnistu þar sem viðkomandi starfsmaður heimsótti ekki hjúkrunardeildir heimilanna.

21. september 2020.

Sigurður Garðarsson, framkvæmdastjóri Naustavarar.

*Þjónustusími Naustavarar 585 9300 er eftir sem áður opinn allan sólarhringinn.

Morgunblaðið: Fangaði áfengislausa Bríó-andann best allra

Kristín Marksdóttir starfsmaður á Viðey dagþjálfun, Hrafnistu í Laugarási, bar í dag sigur úr býtum í samkeppni um myndskreytingu á dósir hins áfengislausa Bríó sem nú er fáanlegur í verslunum.

Borg brugghús auglýsti í sumar eftir tillögum að myndskreytingu á Bríó. Tíu ár eru liðin síðan bjórinn vinsæli kom á markað og af því tilefni var gerð áfengislaus útgáfa af honum sem vakið hefur talsverða athygli síðustu vikurnar.

Mikill áhugi reyndist á samkeppni um útlit dósanna. Alls bárust rúmlega tvö hundruð tillögur að myndskreytingum og var meirihluti þeirra frá konum, eða um 60%. Hugmyndir kvennanna féllu líka betur í kramið hjá dómnefnd brugghússins og svo fór að tillögurnar í fimm efstu sætunum voru frá konum.

Sigurtillaga Kristína er uppfærð útgáfa af myndinni sem prýðir hefðbundnu Bríó-dósirnar. „Ég endurteiknaði manninn á þeirri dós og gerði það með smá tvisti; setti á hann klikkuð augu og partíhatt eins og hann væri að fagna tíu ára afmælinu“ Er haft eftir Kristínu í viðtali eftir að úrslit voru gerð kunn. 

Kristín er 23 ára og lauk námi í myndskreytingu við Leeds Art University í vor. Kristín starfar eins og fyrr segir á Viðey dagþjálfun á Hrafnistu Laugarási en þangað koma daglega 30 einstaklingar sem glíma við heilabilun. Tilgangurinn með dagþjálfun er að styðja fólk til þess að geta búið sem lengst heima, viðhalda og/eða auka færni, rjúfa félagslega einangrun ásamt því að létta undir með aðstandendum.

Samstarfsfólk á Hrafnistu óskar Kristínu innilega til hamingju með sigurinn.

Neyðarstjórn Hrafnistu sendi frá sér upplýsingar í dag til íbúa og aðstandenda á Hrafnistuheimilunum um nýjar heimsóknarreglur Hrafnistu sem taka gildi föstudaginn 18. september 2020.

HÉR má lesa bréfið sem sent var út fyrr í dag.

Ágætu íbúar og aðstandendur,

Þar sem COVID-19 smitum hefur aftur  fjölgað í samfélaginu síðustu daga teljum við nauðsynlegt að bregðast við til að vernda okkar viðkvæma hóp íbúa.  Neyðarstjórn Hrafnistu hefur því ákveðið að takmarka þann fjölda sem kemur inn á heimilið á hverjum tíma.

Heimsóknarreglur:

• Aðeins einn gestur má heimsækja hvern íbúa.  Heimilt er að skipta um heimsóknargest á sjö daga fresti. Heimsóknartími er frá xx-xx.*  Undanþága er aðeins veitt við mikil veikindi íbúa og þarf að fá leyfi vaktstjóra deildar.
• Viðkomandi gestur þarf að spritta hendur um leið og komið er inn, í upphafi heimsóknar.
• Við biðjum ykkur um að fara beint inn á herbergi til íbúans og ekki stoppa og spjalla á leiðinni. Ef íbúi er ekki inni á herbergi biðjið þá starfsfólk um að sækja hann, ekki gera það sjálf.
• Virðið 2ja metra regluna og forðist snertingu við íbúa eins og hægt er.
• Að heimsókn lokinni farið þá beint út án þess að stoppa og spjalla á leiðinni. Vinsamlegast sprittið hendur við brottför.
• Heimilt er að íbúi fari út í göngutúr/bíltúr með heimsóknargesti sínum en hitti ekki aðra á meðan þessar takmarkanir eru í gildi.

Vinsamlega kynnið ykkur eftirfarandi reglur:

1. Ekki koma í heimsókn ef þú ert í einangrun eða sóttkví
2. Ekki koma í heimsókn ef þú ert að bíða eftir niðurstöðu úr sýnatöku.
3. Ekki koma í heimsókn ef þú ert með flensueinkenni (kvef, hósta, höfuðverk, beinverki, þreytu, kviðverki, niðurgang o.fl).
4. Ekki koma í heimsókn ef þú varst erlendis fyrir minna en 14 dögum.

Þessar reglur taka gildi 18. september 2020.

Þessar reglur verða endurskoðaðar eftir þörfum og verðið þið upplýst um leið og einhver breyting verður.

Með vinsemd og virðingu,

Neyðarstjórn Hrafnistu

*Heimsóknartími er misjafn á milli heimila. Aðstandendur hafa verið upplýstir um heimsóknartíma á hverju heimili fyrir sig. 

Lauren Natale hefur verið ráðin aðstoðardeildarstjóri hjúkrunar á Miklatorgi – Engey í afleysingu fyrir Guðlaugu Helgu Helgadóttur sem er farin í fæðingarorlof. Lauren útskrifaðist sem hjúkrunarfræðingur frá University of Massachusetts Lowell í Bandaríkjunum árið 2012. Hún starfaði sem hjúkrunarfræðingur á hjarta- og bráðadeild í Bandaríkjunum þar til hún flutti til Íslands. Lauren hóf störf á Miklatorgi – Engey á Hrafnistu Laugarási árið 2016.

Við bjóðum Lauren velkomna í stjórnendahóp Hrafnistu.

Í morgunblaðinu sl. fimmtudag birtist grein sem ber heitið Hjúkrunarheimilin og seinni COVID-19 bylgjan og eftir Önnu Birnu Jensdóttur framvæmdastjóra Sóltúns og Maríu Fjólu Harðardóttur forstjóra Hrafnistu. Greinina skrifuðu þær fyrir hönd Samtaka fyrirtækja í velferðarþjónustu (SFV) en þær eiga báðar sæti í stjórn samtakanna og eru í samstarfshópi um starfsemi hjúkrunarheimila og dagdvala í COVID-19 faraldri.

HÉR má lesa greinina.

Neyðarstjórn Hrafnistu sendi frá sér upplýsingar í dag til íbúa og aðstandenda á Hrafnistuheimilunum um nýjar heimsóknarreglur Hrafnistu sem taka gildi mánudaginn 14. september.

HÉR má lesa bréfið sem sent var út fyrr í dag.

Heimsóknarreglur Hrafnistu frá 14. september 2020:

• Tveir gestir hafa heimild til að koma í heimsókn á heimsóknartíma viðkomandi Hrafnistuheimilis (saman eða í sitthvoru lagi). Barn má vera annar aðilinn af þessum tveimur.
• Gestir skulu fara beint inn á herbergi íbúa og vera þar á meðan heimsókn stendur. Ekki er heimilt að dvelja í eldhúsi, borðstofu, setustofu eða öðrum miðrýmum deilda á meðan á heimsókn stendur.
• Virða þarf áfram eins og hægt er 1m nándarmörk milli gesta, annarra íbúa og starfsfólks heimilisins.

Undanþága frá þessum reglum er skoðuð ef íbúi er alvarlega veikur.

Íbúar Hrafnistu þurfa að viðhafa eins mikla sóttkví og hægt er. Forðast með öllu verslunarferðir og heimsóknir þar sem fleiri en 10 koma saman.

Alls ekki koma inn á Hrafnistu ef:

1. Þú ert í sóttkví
2. Þú ert í einangrun eða að bíða eftir niðurstöðu úr sýnatöku
3. Þú hefur verið í einangrun og ekki eru liðnir 14 dagar frá útskrift.
4. Þú ert með COVID-19 lík einkenni (kvef, hósta, hita, höfuðverk, beinverki, þreytu, kviðverki, niðurgang o.fl.).
5. Þú ert með einhver önnur almenn einkenni um veikindi.

Munið að ávallt þarf að sýna ýtrustu varkárni og virða sóttvarnaráðstafanir í heimsóknum.

Kær kveðja,

Neyðarstjórn Hrafnistu

11. september 2020  

Eygló Tómasdóttir hefur verið ráðin deildarstjóri á Viðey, Hrafnistu Laugarási. Viðey er dagþjálfun fyrir einstaklinga með heilabilun.

Eygló útskrifaðist sem hjúkrunarfræðingur árið 2006 frá Háskóla Íslands. Hún starfaði sem hjúkrunarfræðingur á heilsugæslu höfuðborgarsvæðisins og síðan í nokkur ár sem hjúkrunarstjóri í Seljahlíð.

Eygló kom til starfa á Hrafnistu Laugarási árið 2015. Fyrst sem aðstoðardeildarstjóri en tók síðan við sem deildarstjóri á Lækjartorgi árið 2016. Hún lauk diplómanámi í öldrunarhjúkrun árið 2016 frá Háskóla Íslands og stundar nú diplómanám í hjúkrunarstjórnun við HÍ.

Við óskum Eygló til hamingju með starfið og velfarnaðar á nýjum vettvangi á Hrafnistu Laugarási. Einnig þökkum við Elínborgu fráfarandi deildarstjóra fyrir mjög gott samstarf og óskum henni velfarnaðar í starfi.

Viðey dagþjálfun á Hrafnistu í Laugarási tók til starfa þann 6. maí 2019. 

Dagþjálfun er ætluð fyrir einstaklinga með heilabilun og er deildin með leyfi fyrir 30 einstaklinga á degi hverjum. Tilgangurinn með dagþjálfun er að styðja fólk til þess að geta búið sem lengst heima, viðhalda og/eða auka færni, rjúfa félagslega einangrun og létta undir með aðstandendum.

Dagþjálfun felst m.a. í samverustundum, þar sem boðið er upp á upplestur, söng, félagsstarf ýmis konar, göngutúra, leikfimisæfingar, handavinnu og máltíðir svo að eitthvað sé nefnt. 

Myndlistasýning með verkum eftir Marinó Óskarsson, íbúa á Hrafnistu, hefur verið opin frá því í júlí í Menningarsalnum á Hrafnistu Hraunvangi. Verk Marinós eru til sölu en vegna heimsóknatakmarkana hafa færri haft tök á að skoða myndirnar. Sýningunni lýkur 13. september nk.

HÉR er hægt að skoða nánar nafn og verð á hverri mynd. Ef óskað er eftir frekari upplýsingum er velkomið að hafa samband við Hrafnistu Hraunvang í síma 585 3000.