Fréttasafn

Alzheimer kaffi verður haldið fimmtudaginn 5. janúar nk. kl. 17:00 að Hæðargarði 31.

Ólína Kristín Jónsdóttir, hjúkrunarfræðingur og forstöðumaður Maríuhúss mun fjalla um framúrskarandi rannsóknir og umönnun fólks með heilabilun. 

Alzheimerkaffi er fyrir fólk með alzheimer eða aðra minnissjúkdóma og aðstandendur þeirra

Markmiðið er að gefa fólki tækifæri til að koma saman, opna umræðuna um erfiðleika fólks með þennan sjúkdóm og gefa þeim og aðstandendum kost á að hitta aðra sem glíma við svipaðan vanda.

Einnig að veita ráðgjöf, fræðslu, spjalla, syngja, gleðjast og eiga gæðastundir. 

Aðgangseyrir 500 kr.

Allir velkomnir!

Dalla Gunnlaugsdóttir, starfsmaður í aðhlynningu á Lækjartorgi Hrafnistu í Reykjavík, hefur starfað á Hrafnistu í 15 ár. Um leið og við óskum henni til hamingju með áfangann er henni þakkað fyrir gott starf og þá tryggð sem hún hefur sýnt heimilinu.

Árið 2017 er mikið afmælisár í sögu Hrafnistu.

Hrafnista byrjar afmælisárið af krafti og býður íbúum og öðrum gestum upp á Vínartónleika í hæsta gæðaflokki.

Stórsöngvararnir Elmar Gilbertsson tenór og Guðrún Ingimarsdóttir sópran, sem voru stjörnur Vínartónleika Sinfoníuhljómsveitar Íslands árið 2016, munu heimsækja okkur ásamt Önnu Guðnýju Guðmundsdóttur undirleikara og bjóða upp á fjörlega dagskrá.

ALLIR VELKOMNIR!

Tónleikarnir verða haldnir sem hér segir:

2. janúar (mán) kl. 10:30 - Hrafnista Hafnarfirði

2. janúar (mán) kl. 13:30 – Hrafnista Nesvöllum

2. janúar (mán) kl. 15:30 – Hrafnista Hlévangi

3. janúar (þri) kl. 14:00 – Hrafnista Kópavogi

4. janúar (mið) kl. 14:00 – Hrafnista Reykjavík

Nánari upplýsingar má finna á hverju heimili fyrir sig.

Birna María Einarsdóttir hjúkrunarfræðingur hefur verið ráðinn aðstoðardeildarstjóri á Lækjartorg/Viðey/Engey Hrafnistu í Reykjavík frá og með 3. janúar 2017. Birna hefur starfað sem hjúkrunarfræðingur á Hrafnistu í Reykjavík og LSH en tekur nú við stöðu aðstoðardeildarstjóra.

Við óskum Birnu hjartanlega til hamingju og bjóðum hana velkomna í stjórnendahóp Hrafnistu.

Sjómannadagsráð og stjórn Hrafnistu sendir heimilisfólki, aðstandendum og starfsfólki Hrafnistuheimilanna sínar bestu óskir um gleðileg jól og farsæld á nýju ári. Með þakklæti fyrir gott samstarf og samvinnu á árinu sem er að líða.

Undanfarna daga hefur Pétur Magnússon, forstjóri Hrafnistu, farið í árlega jólaheimsókn á öll Hrafnistuheimilin ásamt fríðu föruneyti. Hópurinn hefur heimsótt allar deildar og einingar Hrafnistuheimilanna og sungið og spilað jólalög fyrir íbúa, starfsfólk og aðra gesti. Skemmtilegur siður og hátíðleg heimsókn sem heimilisfólk og starfsfólk kann vel að meta og kemur öllum í jólaskap.

Starfsfólk Hrafnistuheimilana á höfuðborgarsvæðinu héldu sitt árlega jólaball í Hafnarfirðinum þann 11. desember sl. 
Fullorðinir og börn skemmtu sér vel saman og jólasveinarnir kíktu til okkar með glaðning handa börnunum.

Myndir: Anna Björg Sigurbjörnsdóttir 
Frétt: Harpa Björgvinsdóttir

Þann 9. desember sl. bauð Hrafnista öllu starfsfólkinu á heimilinu í jólamat. Fólk kunni vel að meta og rann purusteikin ljúflega niður með jólaölinu. Þennan dag klæddist starfsfólk rauðu til að auka á jólastemminguna.