Fréttasafn

Aðventuvagn Þjóðleikhússins heimsótti íbúa á Hrafnistu Sléttuvegi síðastliðinn föstudag og flutti skemmtidagskrá sem nefnist „Samt koma jólin“. Er þetta eitt af þeim verkefnum sem Þjóðleikhúsið hefur boðið upp á nú í desember og felst í því að svokallaður aðventuvagn Þjóðleikhússins, ferðast um og færir fólki jólaandann.

Eins og segir á heimasíðu Þjóðleikhússins er það hópur listamanna Þjóðleikhússins sem keyrir um á sér útbúnum bíl og heimsækir staði þar sem fólk býr við einangrun vegna faraldursins. Fyrir utan húsin er flutt tuttugu mínútna skemmtidagskrá sem yljar og hlýjar á erfiðum tímum. Sungin eru jólalög úr ýmsum áttum, flutt eru jólakvæði og stuttur leikþáttur. Dagskrárinnar má njóta utan húss, á svölum og úr gluggum, en henni er jafnframt streymt fyrir þá sem ekki geta farið út, og geta þeir þá notið hennar af skjám innan dyra um leið og hún fer fram.

Aðventuvagninn hefur heimsótt meðal annars dvalarheimili, hjúkrunarheimili, þjónustuíbúðir og félagsmiðstöðvar aldraðra.

Hrafnistuheimilin eru meðal þeirra sem hafa þegið þetta höfðinglega boð Þjóðleikhússins og þökkum við leikhópnum kærlega fyrir þá skemmtun sem íbúar okkar hafa notið nú í desember.

Meðfylgjandi myndir voru teknar þegar leikhópurinn heimsótti Hrafnistu Sléttuveg fyrir helgi.

Jólaundirbúningur er í fullum gangi á Hrafnistuheimilunum þessa dagana. Smákökubakstur með lokkandi ilm úr eldhúsinu, föndur, jólabingó, spil, heitt súkkulaði með rjóma, sherrýtár og notalegar samverustundir. Aðventuvagn Þjóðleikhússins hefur verið á ferðinni á milli Hrafnistuheimilanna og glatt íbúa okkar með jólasögum, söng og gleði.

Hrafnista er svo lánsöm að eiga marga ómetanlega velgjörðarmenn. Má þar m.a. nefna  Lionsmenn sem mættu galvaskir og  settu upp jólatré á Hrafnistu Hlévangi í Reykjanesbæ í lok nóvember. 

Hrafnista Ísafold í Garðabæ hefur átt farsælt samstarf við leikskólann Sjáland og á dögunum komu leikskólabörnin í heimsókn í garðinn á Ísafold og skreyttu jólatréð í garðinum með föndri sem þau voru sjálf búin að útbúa.

Í vikunni var svo Rauður dagur þar sem ölllum var boðið upp á jólamat og jólagjöfum var dreift til starfsmanna.

Meðfylgjandi myndir, sem teknar hafa verið á aðventunni á Hrafnistuheimilunum, tala sínu máli.

Ágætu íbúar og aðstandendur,

Neyðarstjórn Hrafnistu* er þessa dagana að leggja lokahönd á heimsóknarreglur sem munu gilda um jól og áramót. Þær upplýsingar verða kynntar um leið og þær liggja fyrir.

*Í Neyðarstjórn Hrafnistu sitja aðilar úr Framkvæmdaráði Hrafnistu. Kallað er eftir ráðgjöf frá sérfræðingum og fleiri aðilum sem sitja fundi Neyðarstjórnar ef þörf þykir hverju sinni. Netfang neyðarstjórnar er neydarstjorn@hrafnista.is

Þessa dagana er verið að dreifa til starfsmanna Hrafnistu NIVEA kremi sem Hrafnistu hefur borist en það er fyrirtækið Beiersdorf AG sem er að færa öllu starfsfólki Hrafnistu, um 1500 talsins, þessa gjöf. Beiersdorf AG er þekktast fyrir vörumerki sín í húðvörum og sjampói, m.a. undir merkjum NIVEA.

Í sumar gaf fyrirtækið Hrafnistu veglega peningagjöf sem nýtt var til tækjakaupa.

Beiersdorf á Íslandi er í 100% eigu móðurfélagsins í Þýskalandi, Beiersdorf AG. Saga félagsins nær aftur til ársins 1882 í Þýskalandi en útibú þeirra var opnað hérlendis árið 2005.

Saga Beiersdorf og NIVEA á Íslandi er þó mun lengri og byrjaði sannarlega árið 1907.

Hrafnista og starfsfólk Hrafnistu þakkar Beiersdorf af heilum hug fyrir höfðinglegar gjafir sem koma svo sannarlega til með nýtast vel í okkar starfsemi og gleðja okkar starfsfólk.

Árlegt jólakaffi á Sjávar- og Ægishrauni, Hrafnistu Hraunvangi í Hafnarfirði, fór fram í dag en síðastliðin fimm ár hefur starfsfólkið á Sjávar- og Ægishrauni haldið jólakaffi fyrir íbúa deildarinnar. Allt starfsfólk deildarinnar leggur hönd á plóg og útbýr ýmiskonar kræsingar til að setja á sameiginlegt kaffihlaðborð og eldhúsið á Hrafnistu útbýr heitt súkkulaði og rjóma ofan í mannskapinn.

Jólakaffið var haldið með breyttu sniði í ár. Halda þurfti boðið á nýjum stað og borðsalnum var hólfaskipt samkvæmt settum sóttvarnar reglum. Ekki var hægt að fá utanaðkomandi aðila til að syngja og skemmta að þessu sinni eins og áður hefur verið en starfsmaður á deildinni tók að sér að syngja nokkur jólalög þar á meðal Heims um ból þar sem allir tóku vel undir í söng.

Það var því sannarlega hátíðarbragur yfir öllu á Sjávar- og Ægishrauni í dag og íbúar og starfsfólk voru að vonum ánægð með samveru dagsins.

Meðfylgjandi myndir voru teknar í jólakaffinu í dag.

Ágætu íbúar og aðstandendur,

Neyðarstjórn Hrafnistu hefur ákveðið að framlengja gildandi heimsóknarreglur eins og þær hafa verið síðustu vikur. Samfélagið er enn á viðkvæmu stigi í faraldrinum og því verður ekki rýmkað að þessu sinni. Eins og ávallt horfir Neyðarstjórn Hrafnistu til stöðunnar almennt í samfélaginu hvað fjölda covid smita varðar, sem og þeirra reglna sem í gildi eru á hverjum tíma. Neðangreindar reglur munu því gilda áfram til og með 9. desember næstkomandi.

Upplýsingar um heimsóknartíma veitir hvert heimili fyrir sig.

• Aðeins einn gesturhefur leyfi til að heimsækja hvern íbúa tvisvar sinnum 2.des-9.des.
• Munið að spritta hendur við komu og áður en þið yfirgefið heimilið.
• Allir gestir þurfa að koma með andlitsgrímu (maska). Óheimilt er að koma með taugrímu.
• Vinsamlega hafið grímuna á ykkur allan tímann á meðan heimsókn stendur.
• Vinsamlega farið beint inn á herbergi íbúa, ekki stoppa og spjalla á leiðinni. Ef íbúi er ekki inni á herbergi þá biðjið þið starfsfólk að sækja hann, ekki gera það sjálf.
• Virðið 2ja metra regluna og forðist snertingu við íbúa.
• Undanþága frá þessu er aðeins veitt við mikil veikindi íbúa og þarf leyfi frá vaktstjóra deildar.
• Börn undir 18 ára hafa ekki leyfi til að koma í heimsókn.
• Heimilt er að fara með íbúa út í göngutúr í nærumhverfi á meðan heimsókn stendur.
• Ekki er heimilt að fara í bíltúr eða heimsókn með heimsóknargesti sínum.
• Starfsfólki Hrafnistu ber skv. lögum að tilkynna brot á sóttvarnarlögum til lögreglu ef þeir verða varir við slík brot.

Vinsamlega EKKI koma inn á Hrafnistu ef:

• Þú ert í sóttkví eða einangrun
• Þú bíður eftir niðurstöðu úr sýnatöku
• Þú ert með flensulík einkenni (kvef, hósta, hita, höfuðverk, beinverki, þreytu, kviðverki, niðurgang o.fl.).
• Þú varst erlendis fyrir minna en 14 dögum.

Kæra þakkir fyrir samstöðuna.

Með vinsemd og virðingu,

Neyðarstjórn Hrafnistu*

*Í Neyðarstjórn Hrafnistu sitja aðilar úr Framkvæmdaráði Hrafnistu. Kallað er eftir ráðgjöf frá sérfræðingum og fleiri aðilum sem sitja fundi Neyðarstjórnar ef þörf þykir hverju sinni. Netfang neyðarstjórnar er neydarstjorn@hrafnista.is

Undanfarið hafa íbúar á Hrafnistu Hraunvangi unnið að skemmtilegu verkefni sem fólst í því að klippa út laufblöð og skrifa niður það sem þau vildu þakka fyrir. Verkefnið var svo hengt upp á hverri deild. Útkoman er mjög skemmtileg og lífgar upp á andann.

Íbúar á Hrafnistu Nesvöllum héldu áfram smákökubakstri í gær og bökunarilmur barst um allt hús.

„Aðventuvagn Þjóðleikhússins“ er verkefni sem hópur listamanna í Þjóðleikhúsinu fór af stað með í gær og mun hópurinn ferðast á milli staða næstu vikur. Keyrt er um á sérútbúnum bíl og heimsóttir eru staðir þar sem fólk býr við einangrun vegna faraldursins. Bílnum er lagt fyrir utan, hann opnaður og honum breytt í leiksvið.

Aðventuvagninn heimsótti Hrafnistu Skógarbæ í gær og leikarar sungu jólalög og lásu vísur í anda jólanna. Þeir íbúar sem höfðu tök á nutu skemmtunarinnar með því að bregða sér út í garð eða út á svalir, aðrir horfðu á viðburðinn í gegnum sjónvörp en streymt var frá viðburðinum inn á deildar. Boðið var upp á heitt súkkulaði og nýbakaðar smákökur.  

Íbúar og starfsfólk Hrafnistu í Skógarbæ þakka leikhópnum kærlega fyrir frábæra skemmtun.

RÚV var á staðnum - fréttaskot