Í annað sinn á þremur árum fagnar Hrafnista Boðaþing sigri sem Lífshlaups meistarar Hrafnistu. Lífshlaupið er árlegt heilsu- og hvatningarverkefni Íþrótta- og Ólympíusambands Íslands sem höfðar til allra aldurshópa. Í Lífshlaupinu eru landsmenn allir hvattir til þess að huga að sinni daglegu hreyfingu og auka hana eins og kostur er þ.e. í frítíma, vinnu, í skóla og við val á ferðamáta. Vinnustaðakeppni í Lífshlaupinu stendur yfir í þrjár vikur í febrúar og hefur starfsfólk á Hrafnistuheimilunum ekki látið sitt eftir liggja. Stofnaðir hafa verið fjölmargir hreyfihópar innan Hrafnistu og heimilin hafa síðan keppt sín á milli um titilinn Lífshlaups meistarar Hrafnistu.

Keppnin var hörð að þessu sinni og sigurvegararnir frá í fyrra á Hrafnistu Skógarbæ börðust til síðasta blóðdropa og aðeins vantaði herslumun upp á að liðið héldi farandbikarnum áfram í Breiðholtinu. Skammt á eftir komu síðan Hrafnista Sléttuvegur og Hrafnista Ísafold. Tekið skal fram að öll heimilin stóðu sig frábærlega! Nöfn allra þátttakenda í Lífshlaupinu á Hrafnistu fóru síðan í pott og gat starfsfólk átt von á veglegum vinningum þegar dregið var af handahófi upp úr pottinum. Fjölmargir voru dregnir út og verða vinningar afhentir á næstu dögum.

Átakið lífgaði svo sannarlega upp á annars dimman febrúarmánuð og var stórkostlegt að fylgjast með frammistöðu starfsfólks.

Meðfylgjandi mynd var tekin þegar þátttakendur Hrafnistu í Boðaþingi (á myndina vantar fjölmargar kempur) tóku á móti farandbikarnum til varðveislu í eitt ár sem Lífshlaupsmeistarar Hrafnistu 2024.

Hrafnista óskar öllum þátttakendum til hamingju með frábæra frammistöðu!