Fréttasafn

Þorrinn var haldinn hátíðlegur á Hrafnistu Nesvöllum föstudaginn 26. janúar sl. Mættu þar prúðbúnir íbúar, aðstandendur og starfsfólk til að gæða sér á dýrindis þorramat sem var skolað niður með íslensku brennivíni eða bara okkar góða malt og appelsíni.  Dói, félagi úr harmonikkufélagi Suðurnesja, sá um að spila íslensk þjóðlög á harmonikkuna. 

Kristín Hrund Whitehead hefur verið ráðin mannauðsfulltrúi hjá Hrafnistuheimilunum.

Kristín Hrund lauk M.S. prófi í mannauðsstjórnun frá Háskóla Íslands 2011, M.A. prófi í uppeldis- og kennslufræðum, með áherslu á fullorðinsfræðslu, endurmenntun og tölfræðilegri úrvinnslu gagna, frá  Albert – Ludwigs háskólanum í Freiburg í Þýskalandi. 

Kristín starfaði sem sérfræðingur á mannauðssviði Olís 2013-2017.  Í störfum sínum þar vann Kristín að fjölbreyttum verkefnum á sviði mannauðsmála og kom einnig að launavinnslu og fræðslumálum.    Áður vann Kristín meðal annars sem háskólakennari um 3ja ára skeið í Þýskalandi.

Þann 19. janúar sl. var Þorri blótaður á Hrafnistu Hlévangi. Herlegheitin hófust kl. 12 og mættu þar íbúar, aðstandendur og starfsmenn prúðbúnir til veislu. Gæddu gestir sér á dýrindis þorramat og runnu hrútspungar, sviðasulta, hvalur og ýmislegt fleira góðgæti ljúflega niður með íslensku brennivíni.

Harmónikkufélagarnir Baldvin og Dói þöndu nikkuna og tóku veislugestir vel undir í söngnum.

Þorrablót Hrafnistu í Garðabæ- Ísafold var haldið hátíðlegt í hádeginu á bóndadaginn, þann 19. janúar sl.

Samkvæmt gömlum hefðum voru trog borin á borð með dýrindis þorramat sem skolað var niður með íslensku brennivíni. Allir tóku hraustlega til matar síns og létu vel af veigunum. Sveinn Sigurjónsson og Ragnar Torfason spiluðu undir borðhaldi og stýrðu samsöng. Þar var m.a. tekið minni karla og minni kvenna þar sem hart var barist um hvaða hópur bæri af í söng og útgeislun.

Pétur Magnússon forstjóri Hrafnistuheimilanna fór með gamanmál og að lokum var öllum karlmönnum færð rós í tilefni dagsins.

Þorrablót Hrafnistu í Reykjavík var haldið föstudaginn 19. janúar sl.  Íbúar og gestir fjölmenntu í Skálafell á aðalskemmtunina sem hófst kl. 17:00. Pétur  Magnússon forstjóri Hrafnistuheimilanna setti þorrablótið og veislustjóri kvöldsins var Regína Ósk Óskarsdóttir og hélt hún upp góðu fjöri. Ræðumaður kvöldsins var Sigurður Garðarsson framkvæmdastjóri Naustavarar. Regína og Sigurður fóru einnig með minni karla og kvenna.

Sigursveinn Þór Árnason, gítarleikari og maður Regínu, spilaði og söng skemmtileg lög með konu sinni.

Eftir skemmtunina var þorramatur á boðstólnum og  gæddu gestir sér meðal annars á hákarli, hrútspungum og hval ásamt ýmsu öðru góðgæti.

Bragi Fannar harmonikkuleikari spilaði á nikkuna undir borðhaldi og stjórnaði hópsöng í Skálafelli.

Einnig var þorragleði á hjúkrunardeildum í húsinu, skemmtuninni í Skálafelli var sjónvarpað í gegnum á Hrafnisturásina upp á deildar. Harmonikkuleikarar fóru um húsið og spiluðu undir borðhaldi inn á deildum.

Þórdís Unnur Þórðardóttir, sjúkraliði á Sól-/ og Mánateig Hrafnistu í Reykjavík, hefur starfað á Hrafnistu í 20 ár. Um leið og við óskum henni til hamingju með áfangann er henni þakkað fyrir gott starf og þá tryggð sem hún hefur sýnt heimilinu.

Á meðfylgjandi mynd eru frá vinstri: Pétur Magnússon forstjóri, Arna Garðarsdóttir aðstoðardeildarstjóri á Sólteig, Þórdís, Sigrún Stefánsdóttir forstöðumaður Hrafnistu í Reykjavík og Dagný Jónsdóttir deildarstjóri á Sól-/ og Mánateig. 

Mario Adolfo Rivera Vivar, starfsmaður í eldhúsi Hrafnistu í Reykjavík, hefur starfað á Hrafnistu í 10 ár. Um leið og við óskum honum til hamingju með áfangann er honum þakkað fyrir gott starf og þá tryggð sem hann hefur sýnt heimilinu.

Á meðfylgjandi mynd eru frá vinstri: Ólafur Haukur Magnússon yfirmatreiðslumaður, Mario, Pétur Magnússon forstjóri og Harpa Gunnarsdóttir fjármálastjóri Hrafnistu. 

Guðbjörg Hassing, starfsmaður í iðjuþjálfun og félagsstarfi Hrafnistu í Reykjavík, hefur starfað á Hrafnistu í 10 ár. Um leið og við óskum henni til hamingju með áfangann er henni þakkað fyrir gott starf og þá tryggð sem hún hefur sýnt heimilinu.

Á meðfylgjandi mynd eru frá vinstri: Sigrún Stefánsdóttir forstöðumaður Hrafnistu í Reykjavík, Sigurbjörg Hannesdóttir deildarstjóri iðjuþjálfunar, Pétur Magnússon forstjóri Hrafnistu og Guðbjörg Hassing.