Fréttasafn

Kórónaveiran á Íslandi og íbúar á Hrafnistu

Lesa meira...

 

 Staða mála vegna þess að sýking af völdum Kórónaveirunnar (COVID-19) hefur verið staðfest á Íslandi:

 

Íbúar Hrafnistu eru flestir aldraðir og / eða með ýmsa undirliggjandi sjúkdóma. Þeir eru því í sérstökum áhættuhóp tengt því að veikjast alvarlega af Kórónaveirunni. Við viljum því biðja þá sem eru með kvefeinkenni, flensulík einkenni eða hafa ferðast nýlega til skilgreindra áhættusvæða samkvæmt upplýsingum á vef Landlæknis að gæta varúðar og koma ekki í  heimsóknir á Hrafnistuheimilin. 

Mikilvægt er að þeir sem eru frískir, hafa ekki verið á skilgreindum áhættusvæðum og hafa því ekki ástæðu til að ætla að þeir hafi smitasta af veirunni hafi eftirfarandi í huga:

  • Handþvottur er mikilvægasta ráðið til að forðast smit og einnig er mikilvægt að nota handspritt. Hafið þetta alltaf í huga þegar komið er inn á heimilin.
  • Forðist alla líkamlega snertingu eins og hægt er svo sem handabönd, faðmlög og kossa við íbúa.
  • Forðist að koma við snertifleti í almennum rýmum svo sem handriði og hurðarhúna.

Við bendum ykkur á að kynna ykkur leiðbeiningar á vef Landlæknisembættisins https://www.landlaeknir.is/ því staða mála og leiðbeiningar þeim tengdar geta breyst dag frá degi.

 

Heilbrigðissvið Hrafnistu

 

Lesa meira...

Nýtt hjúkrunarheimili Hrafnistu fyrir 99 manns vígt í dag við Sléttuveg í Fossvogi

Lesa meira...

Í dag var nýtt hjúkrunarheimili fyrir 99 íbúa vígt við Sléttuveg í Fossvogi að viðstöddu fjölmenni gesta, þar á meðal heilbrigðisráðherra, Svandísi Svavarsdóttur, borgarstjóra Reykjavíkur, Degi B. Eggertssyni og Hálfdani Henrýssyni, formanni Sjómannadagsráðs höfuðborgarsvæðisins, sem fluttu stutt ávörp. Heimilið er í eigu ríkissjóðs (85%) og Reykjavíkurborgar (15%) sem samdi við Sjómannadagsráð og Hrafnistu um reksturinn og sem jafnframt höfðu umsjón með framkvæmdum, sáu um allan undirbúning, skipulagsmál, útboð og samninga við hönnuði, verktaka og birgja. Á heimilinu, sem er hið 8. sem Hrafnista starfrækir á suðvesturhorni landsins, eru um 100 stöðugildi.

Kærkomin fjölgun hjúkrunarrýma

Við opnun hjúkrunarheimilisins verður kærkomin fjölgun hjúkrunarrýma að veruleika en erfitt ástand í starfsemi Landspítala undanfarin misseri hefur ekki síst stafað af miklum skorti á slíkum rýmum eins og stjórnendur spítalans, landlæknir og fleiri hafa ítrekað bent á. Fyrstu fjórir íbúarnir eru þegar fluttir inn og í lok næstu viku verða íbúar orðnir um 30 talsins.

Hjúkrunarheimilið er mikilvægur hluti nýs lífsgæðakjarna

Með tilkomu þessa nýja hjúkrunarheimilis verða hjúkrunarrými Hrafnistu um 800. Heimilið er mikilvægur hluti nýs lífsgæðakjarna sem Sjómannadagsráð og samstarfsaðilar þess, ríki og borg, byggja upp í Fossvogsdal og hefur fengið nafnið Sléttan. Vígsla heimilisins markar fyrsta áfanga verkefnisins, en aðrir eru vígsla þjónustumiðstöðvar Sléttunnar sem tekur til starfa í áföngum frá og með apríl og síðan upphaf á útleigu 60 nýrra leiguíbúða Naustavarar, dótturfélags Sjómannadagsráðs, á komandi sumri í nýrri samtengdri byggingu.

Allar rekstrareiningarnar tengjast miðlægt

Hjúkrunarheimilið er í eigu ríkis og borgar og annast Hrafnista reksturinn. Þjónustumiðstöð Sléttunnar er í eigu Sjómannadagsráðs, og byggð á vegum þess, milli hjúkrunarheimilisins og leiguíbúða Naustavarar og gegnir miðstöðin m.a. hlutverki sameiginlegs inngangs í allar rekstrareiningar. Árið 2022 mun Naustavör svo taka í notkun 80 leiguíbúðir til viðbótar þeim 60 í sumar og verður síðari áfanginn einnig tengdur öðrum húsum á Sléttunni. Lífsgæðakjarninn á Sléttunni er sá fjórði sem Sjómannadagsráð hefur þróað í 80 ára sögu sinni og búa Sjómannadagsráð og Hrafnista yfir mikilli sérfræðiþekkingu á sviði umönnunar og þjónustu við aldraðra.

Samlegðaráhrifin forsenda hámarkshagkvæmni á færri fermetrum

Frá því að fyrsta skóflustunga að byggingu hjúkrunarheimilisins var tekin í nóvember 2017 eru liðnir 27 mánuðir og fyrstu íbúarnir þegar fluttir inn. Allar tímaáætlanir hafa staðist ásamt því sem verkefnið er vel innan setts fjárhagsramma, sem Reykjavíkurborg fól Sjómannadagsráði að hafa eftirlit með. Ljóst er að heildarkostnaður vegna heimilisins, sem er aðeins um 2,9 milljarðar króna, verður mun lægri en sambærileg framkvæmdaverkefni í þágu aldraðra. Ástæðan er hvernig verkefnið var skipulagt og framkvæmt þar sem höfuðáhersla var á mikla samnýtingu húsnæðis Sléttunnar til að geta boðið meiri og betri aðstöðu og þjónustu á sama stað án þess að byggingarmagn yrði óviðráðanlegt í fjárfestingu. Húsin samnýta t.d. aðalanddyri, upplýsingatorg og móttöku, verslun, veitingasal, fjölnotasal, virkniþjálfun og heilsueflingu, dagdvöl, vörumóttöku, tæknirými, geymslur, búningsherbergi, aðstöðu húsvarða og fl. Þar að auki verða sjúkraþjálfun, matarþjónusta, kaffihús, fótsnyrting, hárgreiðsla og fleira í boði í húsnæði Sléttunnar. Án þessarar samnýtingar má gera ráð fyrir að húsakosturinn hefði í heild orðið rúmlega eitt þúsund fermetrum stærri en raunin verður ef þessir þrír aðilar hefðu byggt húsin hver í sínu lagi, án samvinnu.

Ýmsar nýjungar í hönnun og rekstri

Ýmsar nýjungar einkenna hjúkrunarheimilið hvað varðar hönnun, skipulag og rekstur. Heimilið er t.d. hið fyrsta sem byggt er miðað við 65 fermetra á hvern einstakling, en áður var viðmið í reglugerð 75 fermetrar. Nýja hjúkrunarheimilið er því 6.435 fm2 að stærð og samanstendur af níu 11 manna deildum og eru átta deildanna samliggjandi til að auðvelda samstarf og samnýtingu starfsfólks milli deilda. Í hverju herbergi er sér baðherbergi og pláss fyrir sófa og sjónvarp. Þá eru öll herbergi búin loftlyftubúnaði svo unnt sé að flytja rúmliggjandi einstaklinga til innan herbergisins, svo sem til og frá baðherbergi íbúðarinnar. Þá var ekki lagt fyrir sérstökum síma- eða sjónvarpslögnum heldur fara öll samskipti um internet sem aðgengileg eru í öllu herbergjum. Öryggiskerfi í byggingunum eru einnig tengd þráðlausu neti auk þess sem boðið verður upp á sérstakan gestaaðgang að veraldarvefnum. Margar þessara nýjunga og fleiri ónefndar voru þróaðar í samráði við Hrafnistu og tóku mið af áratugalangri reynslu við að veita heimilisfólki og öðrum þjónustuþegum góða umönnun.

Lesa meira...

Fyrsti íbúinn á Sléttuvegi fluttur inn

Lesa meira...

Það var söguleg stund í dag þegar fyrsti íbúinn flutti inn á nýja hjúkrunarheimili Hrafnistu við Sléttuveg. Fyrsti íbúinn heitir Þorbjörg Erna Óskarsdóttir og er hún fædd árið 1934.

Þorbjörg vann lengst af sem dagmóðir og átti sjálf 8 börn. Fleiri íbúar fluttu inn síðar í dag og í lok næstu viku verða íbúar heimilisins orðnir um 30 talsins. Alls eru 99 hjúkrunarrými á nýja heimilinu og mun það taka nokkrar vikur að flytja fólk inn í öll rýmin.

Pétur Magnússon forstjóri Hrafnistuheimilanna, Valgerður K. Guðbjörnsdóttir forstöðumaður Hrafnistu á Sléttuvegi, Anna María Bjarnadóttir deildarstjóri og Elsa Björg Árnadóttir aðstoðardeildarstjóri tóku á móti Þorbjörgu ásamt starfsfólki heimilisins og var henni færður blómvöndur og konfekt.

Þorbjörg kom í fylgd með fjölskyldu sinni og voru þau öll boðin hjartanlega velkomin. Gaman er að segja frá því að fréttastofa RÚV fylgdist með komu Þorbjargar og tók viðtal við hana sem birt verður á næstu dögum.

Meðfylgjandi myndir voru teknar í dag þegar Þorbjörg flutti inn.

 

Lesa meira...

Öskudagur á Hrafnistuheimilunum

Lesa meira...

Það var líf og fjör á öllum Hrafnistuheimilunum 8 í dag þegar íbúar og starfsfólk gerðu sér glaðan dag með því að klæðast ýmsum búningum eða höfuðfötum. Við fengum líka til okkar góða gesti þar sem börn kíktu við í búningum og sungu af mikilli list, öllum til ánægju. 

Meðfylgjandi myndir voru teknar hér og þar á Hrafnistu í dag. 

 

Lesa meira...

2625 bollur á Hrafnistu

Lesa meira...

 

Í tilefni af bolludeginum var starfsfólk eldhússins á Hrafnistu í Laugarási  búið að gera 2625 bollur klárar eldsnemma í morgun sem síðan var dreift til íbúa og starfsfólks Hrafnistuheimilanna.

 

Lesa meira...

Kristján Jóhannsson, Geir Ólafsson og Þórir Baldursson héldu tónleika á Hrafnistu í Laugarási

Lesa meira...

Góðir gestir heimsóttu Hrafnistu í Laugarási í gær þegar þeir Kristján Jóhannsson, Geir Ólafsson og Þórir Baldursson héldu tónleika í Skálafelli fyrir íbúa og gesti við góðar undirtektir. Morgunblaðið í dag birti m.a. skemmtilega umfjöllun um heimsóknina undir yfirskriftinni Gleðin skín á von­ar­hýrri brá á Hrafn­istu.

Við færum þeim félögum bestu þakkir fyrir komuna.

 

Lesa meira...

Sjómannadagsráð gæti byggt og rekið ódýrari hjúkrunarrými og afhent þau fyrr

Lesa meira...

 

Nýlega áttu fulltrúar Sjómannadagsráðs og Hrafnistu fund með heilbrigðisráðherra, til að kynna hugmyndir um átak til að flýta núverandi áætlunum hins opinbera um byggingu og rekstur nýrra hjúkrunarrýma. Frumkvæði og tilefni fundarins var ekki síst umræðan um erfitt ástand í starfsemi Landspítalans, sem stafar ekki síst af miklum skorti á hjúkrunarrýmum, eins og stjórnendur spítalans hafa ítrekað bent á. Vildu fulltrúar Sjómannadagsráðs og Hrafnistu kynna sína hugmyndir um lausn vandans, enda hefur Sjómannadagsráð langa reynsluaf nýbyggingum hjúkrunarrýma og leiguíbúða í fyrir aldraðra.

Áætlanir um 717 ný hjúkrunarrými til 2024

Í greinargerð með núgildandi fjármálaáætlun ríkisstjórnarinnar (2020 – 2024) eru lögð fram markmið um að fjölga nýjum hjúkrunarrýmum um 717  á tímabilinu. Reynsla síðustu ára hefur sýnt að það tekur of langan tíma að koma hjúkrunarheimilum í notkun eftir að samkomulag milli ríkis og sveitarfélags hefur verið undirritað. Mörg dæmi eru um að það líði yfir 5 ár frá því að heilbrigðisráðuneytið tekur ákvörðun um byggingu nýs hjúkrunarheimilis þar til rekstur þess hefst. Ljóst er að með þessu fyrirkomulagi mun reynast torvelt að ná áðurnefndu markmiði, nema að ráðstafanir verði  gerðar til að stytta tímann sem ferlið tekur.

Stenst markmið um byggingartíma og kostnað

Nú styttist í að nýtt hjúkrunarheimili verði tekið í notkun við Sléttuveg í Fossvogi. Verkefnið er samstarfsverkefni þriggja aðila, þ.e. Heilbrigðisráðuneytisins, Reykjavíkurborgar og Sjómannadagsráðs/Hrafnistu. Samkvæmt samningi við Reykjavíkurborg frá maí 2017 tók Sjómannadagsráð, með aðkomu Hrafnistu, að sér að hafa umsjón með framkvæmdum við byggingu á nýju 99 rýma hjúkrunarheimili við Sléttuveg. Nú, aðeins 32 mánuðum síðar, er rekstur hins nýja hjúkrunarheimilis hafinn og fyrstu íbúarnir flytja inn eftir að vígsla þess hefur farið fram þann 28. febrúar næstkomandi. Þetta er styttri framkvæmdatími en áður hefur þekkst, auk þess sem byggingarkostnaður verður talsvert undir þeim markmiðum sem sett voru í samningi ríkisins og Reykjavíkurborgar í október 2016. Það gerist þrátt fyrir að bæði byggingar- og launavísitala hafi hækkað um 15-20% á tímabilinu og gengi krónunnar lækkað um 8-9%. Í samanburði við önnur áform við byggingu hjúkrunarheimila hefur framkvæmdin á Sléttuvegi gengið mun hraðar fyrir sig og byggingarkostnaðurinn verður tugum prósenta lægri en hjá öðrum hjúkrunarheimilum sem nú eru í byggingu, eða hafa nýlega verið tekin í notkun.

Byggist á reynslu og góðum samstarfsaðilum

Þennan góða árangur má þakka góðu samstarfi milli Heilbrigðisráðuneytisins,  Reykjavíkurborgar og Hrafnistu. Að mati Sjómannadagsráðs skiptir það sköpum að hafa frá byrjun aðgang að þeim rekstrararaðila sem tekur við starfseminni til að gera það mögulegt að taka allan þann fjölda ákvarðana sem þarf í svona flóknu verkefni. Hrafnista sem býr að langri og ómetanlegri reynslu af rekstri hjúkrunarheimila sem gerir kleift að skila af sér heimili sem uppfyllir kröfur og væntingar notenda og um leið að skila því innan settra markmiða um byggingartíma og kostnað. Hjúkrunarheimilið á Sléttuvegi fylgir öllum reglum ríkisins um aðstöðu og aðbúnað, auk þess sem þar eru að finna ýmsar nýjungar í hönnun og skipulagi sem gera kleift að veita enn betri þjónustu.

Sjómannadagsráð getur komið að brýnum verkefnum

Á fundinum með ráðherra lýstu fulltrúar Sjómannadagsráðs og Hrafnistu áhuga sínum að koma að frekari uppbyggingu hjúkrunarheimila á næstunni í samstarfi við hið opinbera, að því tilskyldu að stuðst verði við sambærilegt fyrirkomulag og við Sléttuveg. Það fólst í meginatriðum í því að Sjómannadagsráði og Hrafnistu verði falin umsjón með hönnun, framkvæmdum og rekstri hjúkrunarrýmanna. Með slíku samkomulagi væri gerlegt að byggja ný hjúkrunarrými mun hraðar og ódýrar en núverandi fyrirkomulag ríkisins myndi leiða af sér. Meðal verkefna sem hrinda mætti í framkvæmd nú þegar eru t.d. stækkun hjúkrunarheimilisins við Boðaþing í Kópavogi (áætluð 64 rými), nýbygging á stóru hjúkrunarheimili í Reykjavík (100-200 rými) auk annarra brýnna verkefna sem bíða úrlausnar.

 

Lesa meira...

Dagdvöl á Hrafnistu Sléttuvegi

Lesa meira...

 

Dagdvölin er ætluð þeim sem eru 67 ára eða eldri og búa í Reykjavík. Opið verður alla virka daga milli kl. 08:00 - 16:00. Daggestir greiða ákveðið daggjald og akstur er í boði til og frá heimili.

Markmið dagdvalar er að viðhalda sjálfstæði einstaklingsins og rjúfa félagslega einangrun. Hrafnista Sléttuvegi hefur leyfi fyrir 30 rýmum í dagdvöl.

Deildarstjóri dagvalar á Hrafnistu Sléttuvegi er Bryndís Rut Logadóttir. Til að sækja um dagdvöl á Sléttuvegi þarf að fylla út þar til gerða umsókn og með henni er óskað eftir hjúkrunar/læknabréfi í gegnum Sögukerfið.

 

Umsókn um dagdvöl má nálgast hér.

 

Lesa meira...

Síða 19 af 142

Til baka takki