Fréttasafn

Sjúkraþjálfun Hrafnistu í Reykjavík fékk fjölþjálfa að gjöf frá Sjómannafélagi Íslands. Þetta er höfðingleg gjöf sem nýtist vel heimilismönnum og öðrum skjólstæðingum hennar. 

Stjórn Sjómannafélags Íslands afhenti tækið formlega þann 4.maí sl. og fékk kynningu á tækinu. Við á Hrafnistu í Reykjavík þökkum fyrir þessa góðu gjöf.

Á meðfylgjandi mynd má sjá þegar stjórn Sjómannafélags Íslands afhenti fjölþjálfann formlega á sjúkraþjálfunardeild Hrafnistu í Reykjavík. Sigrún Stefánsdóttir, forstöðumaður Hrafnistu í Reykjavík og Ragnheiður Kristjánsdóttir, deildarstjóri veittu tækinu viðtöku.

Í gær bauð iðjuþjálfunin öllum þeim sem komu að lestrarverkefninu okkar í vetur í lokahóf. Þetta voru lestrarvinir okkar úr 6. bekk í Víðistaðaskóla, heimilisfólkið okkar og þeir sem tóku það að sér að hlusta vikulega á krakkana æfa sig í upplestri. Allir voru sammála um hversu skemmtilegt samstarfið var í vetur og var þetta mikil gleðistund.Krakkarnir sögðu það miklu skemmtilegra að æfa sig í upplestri með heimilisfólkinu en heima hjá sér. Það kom fram hjá kennurum skólans að krökkunum hafði farið fram í lestri sem og í lesskilningi sem skilaði sér í hærri einkunum. Við getum því ekki annað en verið stolt af þessu skemmtilega samstarfsverkefni sem vonandi kemur til með að vera árlegt.

Kvennahlaupið fer fram á Hrafnistu í Hafnarfirði föstudaginn 10. júní. Lagt verður af stað kl. 13:00  frá aðalinngangi hússins.

Kvennahlaupsbolirnir eru til sölu í sjúkraþjálfuninni. Verð 2.000.- kr.

Allar konur eru velkomnar hvort sem þær tilheyra Hrafnistu eða ekki.

Kvennahlaupið fer fram á Hrafnistu í Reykjavík mánudaginn 30. maí. Lagt verður af stað kl. 13:00  frá inngangi inn í miðrými á 2. Hæð (Lækjartorg).

Kvennahlaupsbolirnir eru til sölu í Kaupfélaginu á anddyri aðalbyggingar. Verð kr. 2.000.- 

Allar konur eru velkomnar hvort sem þær tilheyra Hrafnistu eða ekki.

Karlakór frá Háskólanum Penn State Pennsilvaníu í Bandaríkjunum heimsótti Hrafnistu í Reykjavík í síðustu viku. Þeir voru á söngferðalagi hér á landi og sungu m.a. í Háskólanum og á Akureyri. Kórinn samanstendur af 50 ungum herramönnum á aldrinum 16 til 21 árs sem sungu af miklum krafti. Það var virkilega gaman að hlýða á sönginn og höfðu heimilisfólk og gestir gaman af. Prúðmannleg framkoma þeirra bar vott um gott uppeldi og virðingu fyrir sínu eldra fólki.

Í gær, fimmtudaginn 19. maí,  var opnuð samsýning 19 þátttakenda í félagsstarfinu/myndlistinni. Það var fullur salur gesta sem að fagnaði áfanganum með listafólkinu. Alls eru á sýningunni um 50 myndir, hver annarri fallegri.

Sýningin stendur til 29. júní og hvetjum við sem flesta til að kíkja við.

Á dögunum var Heimilisiðnaðarfélagið með skemmtilega og fróðlega fræðslu á Hrafnistu í Hafnarfirði.

Lilja H. Halldórsdóttir, starfsmaður í sjúkraþjálfun Hrafnistu Reykjavík, hefur starfað á Hrafnistu í 25 ár. 

Um leið og við óskum henni til hamingju með áfangann er henni þakkað fyrir gott starf og þá tryggð sem hún hefur sýnt heimilinu.

Á meðfylgjandi mynd eru frá vinstri: Sigrún Stefánsdóttir forstöðumaður Hrafnistu í Reykjavík, Ragnheiður Kristjánsdóttir deildarstjóri sjúkraþjálfunar, Lilja og Pétur Magnússon forstjóri Hrafnistu.