Í dag, miðvikudag 7. október kom í ljós að starfsmaður Hrafnistu Sléttuvegi hafði greinst smitaður af kórónaveirunni. Umræddur starfsmaður var síðast í starfi mánudaginn 5.október. Starfsmaðurinn er einkennalaus en var settur í sóttkví af smitrakningarteymi sóttvarnarlæknis um leið og niðurstaða barst í dag. Strax í kjölfarið var þeirri deild sem viðkomandi starfar á lokað og sett í sóttkví.
Engin einkenni hafa greinst meðal íbúa deildarinnar né meðal annarra starfsmanna Hrafnistu á deildinni. Sóttkvíin mun vara meðan smitrakningarteymi sóttvarnarlæknis vinnur að málinu með neyðarstjórn Hrafnistu og stjórnendum deildarinnar. Verið er að greina hvaða starfsfólk þarf að vera í sóttkví og hversu lengi sóttkvíin mun vara.
Öllum aðstandendum íbúa á deildinni hefur verið gert viðvart og boðið að hafa samband við umboðsmenn íbúa og aðstandenda Hrafnistu varðandi frekari upplýsingar. Aðstandendum verður frá og með deginum í dag sendur upplýsingapóstur daglega um stöðu mála.
Fyrir hönd Hrafnistu,
Neyðarstjórn Hrafnistuheimilanna.