Laugardaginn 5. desember 1964 birtist umfjöllun í Vísi um heimsókn hljómsveitarinnar Hljóma úr Keflavík á Hrafnistu í Laugarás þar sem þeir héldu tónleika fyrir íbúa og starfsfólk.
Markús frá Djúpalæk birti þessa grein á fésbókarsíðu sinni og við fáum að birta hana hér:
Gamla fólkið ánægt með Bítillögin.
Bítlar og „bítlamenning“ hefur til þessa eingöngu verið orðað við unga fólkið í heiminum, eldra fólk lætur sér yfirleitt fátt um finnast, þó til séu dæmi um að eldra fólkið sé með á nótunum í þessu efni. Einn af gömlu „skútujöxlunum“ á Dvalarheimili aldraðra sjómanna í Laugarási sagði a.m.k. eitthvað á þá leið við ljósmyndara Vísis „að svona ætti þetta að vera á hverjum degi“, þegar hann hafði hlýtt á hljómleika Hljóma úr Keflavík. Þeir komu í heimsókn í kaffitíma á fimmtudaginn og vöktu hrifningu vistfólksins, sem ekki hafði áður hlýtt á tónleika sem þessa.
Hljómarnir sungu þar sín hvellibjöllulög fyrir gamla fólkið og starfsfólkið og Myndsjáin í dag er einmitt frá þessum hljómleikum (Vísir laugardaginn 5. desember 1964, bls. 3).