Föstudagsmolar

Föstudagsmolar eru vikulegur pistill sem forstjóri Hrafnistu skrifar með upplýsingum til starfsfólks um það sem er efst á baugi í starfsemi Hrafnistuheimilanna. Öðru hverju eru ýmsir úr stjórnendahópi Hrafnistu fengnir sem gestahöfundar föstudagsmola.
 
 
 
 

Föstudagsmolar þriðjudaginn 25. maí 2021 - María Fjóla Harðardóttir, forstjóri

FÖSTUDAGSMOLAR FORSTJÓRA

(þriðjudaginn 25. maí 2021)

 

Kæru samstarfsfélagar,

Þessir föstudagsmolar eru aðeins seinni á ferðinni en vanalega og eru því hálfgerðir þriðjudagsmolar.

Nú fer að styttast í kærkomið sumarfrí hjá okkur. Ég vona að við náum að halda niðri smitum þannig að við getum hist og fagnað saman í sumar. Kannski notið okkar á tónleikum, í útilegu eða hreinlega við að gera ekki neitt með okkar fólki. Það sem mestu máli skiptir er að vera í núinu og njóta.

Nýr varaformaður Sjómannadagsráðs

Það er vel við hæfi nú þegar styttist í sjómannadaginn að bjóða nýjan varaformann Sjómannadagsráðs velkominn til starfa. Hann heitir Aríel Pétursson og hóf hann sjómennskuferilinn árið 2006 á ísfiskstogara hjá HB-Granda. Nú síðast starfaði hann sem sjóliðsforingi um borð í Triton, sem er eftirlitsskip danska flotans. Við bjóðum hann velkominn í Hrafnistuhópinn okkar. Aríel mun á næstu dögum rölta um Hrafnistuheimilin og kynna sér starfið.

Sjómannadagurinn 2021

Fyrir ykkur sem ekki vitið þá hefur Sjómannadagsráð annast árleg hátíðarhöld á Sjómannadaginn, allt frá árinu 1938. Sjómannadagurinn sjálfur er eitt af stóru verkefnum Sjómannadagsráðs fyrir utan að reka næststærstu heilbrigðisstofnun landsins sem er Hrafnista, leiguíbúðir Naustavarar, þjónustumiðstöð, Happdrætti og eiga Laugarásbíó.

Vegna Covid-19 þá verður það í annað skiptið frá því árið 1938 sem hátíðarhöld verða ekki haldin, en hitt skiptið var auðvitað á síðasta ári. Sjómannadagsblaðið verður gefið út sem fyrr og hvet ég ykkur til að hugsa hlýlega til okkar sjómanna á Sjómannadaginn.

Gylfaskýrslan

Fyrirhugað er að halda Málþing í Laugarásbíó þann 27. maí 2021 þar sem farið verður yfir Gylfaskýrsluna og mun Gísli Páll formaður Samtaka fyrirtækja í velferðarþjónustu, Gylfi Magnússon formaður svokölluðu Gylfanefndar, Svandís Svavarsdóttir heilbrigðisráðherra, Helga Vala formaður velferðarnefndar alþingis, Ingibjörg Hjaltadóttir prófessor við hjúkrunarfræðideild HÍ, Haraldur Benediktsson varaformaður fjárlaganefndar og Aldís Hafsteinsdóttir formaður Sambands íslenskra sveitarfélaga leggja sitt til málanna.

Við bindum miklar vonir við þessa skýrslu, líkt og áður hefur komið fram, því þótt áhersla sé lögð á að einstaklingar geti búið heima sem lengst, þá þarf einnig að leggja áherslu á að þeir sem þurfa að flytja inn á hjúkrunarheimili fái þá þjónustu sem þeir þurfa.

Sumarstarfsmenn á Hrafnistu

Líkt og Lóan þá eru þeir starfsmenn sem komnir eru til að leysa okkur af í frí sami ljúfi vorboðinn. Við bjóðum kunnugleg andlit velkomin í meiri prósentu sem og glænýja starfsmenn sem við erum að kynnast í fyrsta skiptið. Við ætlum að leggja okkur fram við að kenna ykkur handtökin og láta ykkur líða vel hjá okkur. En fyrst og fremst ætlum við bara að hafa gaman, því eins og Robin Willams segir: „Spring is the nature´s way of saying, Let´s party!“

Eins og áður er það vel við hæfi að enda föstudagsmolana með því að telja upp þá starfsmenn sem eiga starfsafmæli hjá okkur í maí:

3 ára starfsafmæli: Í Laugarási eru það Bozena Ziolkowska og Þórhildur Katrín Baldursdóttir báðar á Sól-/Mánateig og Þórdís Lilja Samsonardóttir á Lækjartorgi. Í Hraunvangi eru það Andrea Steinþórsdóttir og Sithumini K Ayabadde Dewage báðar á Ölduhrauni og Magdalena Pudo á Bylgjuhrauni. Á Nesvöllum er það Barbara Rebisz.

5 ára starfsafmæli: Í Laugarási eru það Anna María Friðriksdóttir hjúkrunardeildarstjóri á Vitatorgi og Maria Sosniak í ræstingu.

Til hamingju með starfsafmælið og hjartans þakkir fyrir góð störf í þágu Hrafnistu.

 

María Fjóla Harðardóttir,

Forstjóri Hrafnistu

 

Lesa meira...

Síða 4 af 273

Til baka takki