Föstudagsmolar 10. júní 2016 - Pétur Magnússon forstjóri
FÖSTUDAGSMOLAR FORSTJÓRA
Föstudaginn 10. júní 2016.
Ágæta samstarfsfólk,
Glæsilegur Sjómannadagur á Hrafnistu!
Á sunnudaginn var Sjómannadagurinn haldinn hátíðlegur á Hrafnistuheimilunum. Almennt gekk þetta mjög vel og vil ég nota þetta tækifæri og þakka þeim fjölmörgu sem lögðu hönd á plóginn við að gera þetta allt jafn glæsilegt og raun bar vitni!
Myndir og frekari umfjöllun um dagskrá dagsins má finna hér á heimasíðunni og á facebook-síðum Hrafnistuheimilanna.
Kosningar á Hrafnistu!
Það hefur varla farið framhjá neinum að forsetakosningar nálgast. Undanfarið hafa frambjóðendur eitthvað verið að heimsækja Hrafnistuheimilin og hefur það bara gengið vel.
Venju samkvæmt fer fram utankjörstaða-kosning á Hrafnistuheimilunum á höfuðborgarsvæðinu. Á miðvikudaginn var kosning í Kópavogi og á morgun verður kosningin í Reykjavík. Miðvikudaginn 15. júní er svo kosning hjá okkur í Hafnarfirði. Loks verður svo kosið á Reykjanesbæjarheimilunum okkar 20. og 21. júní.
Þetta verður allt auglýst betur á hverju heimili en rétt er að geta þess að þessi kosning er aðeins fyrir íbúa Hrafnistuheimilanna. Gestir dagdvala, í hvíldarinnlögn, íbúar í nærliggjandi húsum eða starfsfólk getur ekki greitt atkvæði.
Það er um að gera að hvetja fólkið okkar til að fara á kjörstað og nýta atkvæðisréttinn. Þetta er líka tilvalin samverustund fyrir ættingja að aðstoða sitt fólk.
Svo er bara að krossa fingur að allir kjósi rétt!
EM veislan byrjar í dag!
…og ef það skildi hafa farið framhjá einhverjum þá byrjar Evrópukeppnin í fótbolta í kvöld. Úrslitakeppnin fer fram í Frakklandi og er helst merkileg fyrir það að Íslandi tókst að tryggja sér þátttökurétt í fyrsta sinn í sögunni (karla megin). Það verður auðvitað mikið um dýrðir en talið er að um 8.000 Íslendingar verði á hverjum leik íslenska liðsins. Aldrei í Íslandssögunni hafa jafnmargir Íslendingar verið samankomnir á einum stað utan Íslands (þjóðhátíð í Vestmannaeyjum ekki talin með).
Leikir íslenska liðsins verða sýndir á RÚV en almennt eru aðrir leikir EKKI sýndir á RÚV, heldur á sérstakri EM-rás sem send er gegnum Sjónvarp Símans og þarf að kaupa í áskrift og einnig eitthvað á Skjá 1. Ánægjulegt er að segja frá því að Síminn hefur boðið Hrafnistuheimilunum aðgang að útsendingum á leikjum á EM í sumar, endurgjaldslaust. Síminn þarf að opna fyrir það í gegnum alla myndlykla – hvort sem þeir eru frá Vodafone, Símanum eða Stöð 2.
Endilega verið í sambandi við húsverði og/eða rafvirkja á ykkar heimilum til að láta opna fyrir þetta.
Við hér á Hrafnistu höfum oft gert einhverja skemmtun tengda þessari keppni og vil ég hér með hvetja alla til að skoða með að halda EM-partý þegar leikir Íslands fara fram; skreyta með fánum, baka, poppa og skapa stemningu. Hugmyndirnar eru óþrjótandi.
Leikir Íslands eru eftirfarandi:
Þriðjudagur 14. júní kl 19:00 Portúgal – Ísland
Laugardagur 18. júní kl 16:00 Ísland – Ungverjaland
Miðvikudagur 22. júní kl 16:00 Ísland – Austurríki
…svo er bara um að gera að njóta.
Góða helgi!
Bestu kveðjur,
Pétur