Föstudagsmolar 19. ágúst 2016 - Pétur Magnússon forstjóri
FÖSTUDAGSMOLAR FORSTJÓRA
Föstudaginn 19. ágúst 2016.
Ágæta samstarfsfólk,
Húðflúrstofa á Hrafnistu?
Ein af skemmtilegustu fréttum þessa mánaðar var án efa héðan frá okkur á Hrafnistu þegar frægasti húðflúrari landsins, Fjölnir tattú, mætti með græjurnar sínar á Sólteig á Hrafnistu Reykjavík og húðflúðraði einn íbúann okkar. Þar með fékk okkar maður sitt fyrsta tattú 88 ára gamall í tilefni að miklu klifurafreki.
Alltaf gaman að að fá skemmtilegar fréttir um Hrafnistu í fjölmiðla. Ég heyri líka að þetta vekur mjög jákvæða athygli á Hrafnistu sem leiðandi aðila í öldrunarmálum enda þurfum við í öldrunarþjónustunni að aðlaga okkur að þeim sem við erum að þjónusta og koma til móts við óskir þeirra - svo það er alls ekki fjarri lagi að tattú-stofur verði á Hrafnistuheimilunum einhvern tímann í framtíðinni...
Tengil á fréttir um þetta má meðal annars finna á forsíðu heimasíðunnar okkar.
Tíðni andláta á hjúkrunarheimilum
Við hér á Hrafnistu erum það stór aðili í öldrunarþjónustu að út frá tölum okkar má oft gera nálganir fyrir landið í heild. Oft hefur verið rætt um fjölda andláta á hjúkrunarheimilum og fáum við fyrirspurnir um það frá ýmsum aðilum. Til fróðleiks reiknuðum við út ákveðin stuðul þó hann sé kannski ekki um mjög ánægjulegt umfjöllunarefni.
Niðurstaðan er sú að á hjúkrunarheimilum má almennt miða við að í hverjum mánuði deyja 2-3 einstaklingar miðað við hver 100 rými. Þetta má því yfirfæra og segja að á 50 rýma deild séu að jafnaði 1-2 andlát í hverjum mánuði.
Þessi tala mun án efa hækka á næstu árum þar sem nýjir einstaklingar sem innritast á hjúkrunarheimili eru sífellt veikari og veikari.
Endurbygging á þaki Hrafnistu Hafnarfirði frestast um ár.
Því miður þurftum við að taka þá ákvörðun á dögunum að fresta endurbótum á þaki Hrafnistu Hafnarfriði en þar stóð til að fara í umfangsmiklar endurbætur. Tvær ástæður eru fyrir þessu; annars vegar sökum þess hve framkvæmdasjóður aldraðra svaraði seint umsókn um styrk og hins vegar sökum þess að eina tilboðinu sem barst í verkið var hafnað þar sem það var langt yfir kostnaðaráætlun.
Verkið verður sett í útboð aftur í haust og munum við byrja verkið snemma í vor. Það sem við gerum hinsvegar fyrir veturinn er að fá verktaka til að fara yfir þakið mjög ítarlega og sjá til þess að ekki komi leki á þakið í vetur.
Auk þess er búið að laga loftræsikerfi hússins töluvert.
Verkefnið verður kynnt nánar síðar.
Góða helgi!
Bestu kveðjur,
Pétur