Við fengum til okkar í heimsókn á Hrafnistu í Reykjavík áhugaverðan gest um daginn. Dr. Allen Power var hér á landi í vikunni til að halda fyrirlestra um heilabilun. Fyrirlesturinn hét Heilabilun – meira en sjúkdómur og lyfjameðferð. Þar fjallaði hann um aðferðir sem hann hefur þróað út frá hugmyndafræði persónumiðaðrar umönnunar og þjónustu. Hann hefur þróað ákveðnar aðferðir sem stuðla að persónu- og tengslamiðaðri meðferð. Hann vill endurskilgreina heilabilun sem breytingu á því hvernig einstaklingur upplifir veröldina í kringum sig. Helsta markmið aðferða hans er vellíðan einstaklingsins og hvernig við stuðlum að því á öllum sviðum og á forsendum þess sem þiggur þjónustuna. Dr. Allen hefur skrifað tvær verðlaunabækur um heilabilun; Dementia beyond drugs og Dementia beyond disease.
Dr. Allen fékk kynningu á Hrafnistu og skoðunarferð um húsið. Hann var mjög áhugasamur og einstaklega skemmtilegur og fræðandi. Eldhugi á þessu sviði með mikla reynslu. Hann starfar á stóru hjúkrunarheimili í Rochester NY og heldur fyrirlestra út um allan heim.
Mjög margt hefur áunnist á þessu sviði á undanförnum árum, við þurfum ekki að fara svo langt aftur í tímann til að sjá það. En það má alltaf gera betur, laga og bæta. Það er ávallt uppörvandi að hitta og spjalla við fólk sem er með nýjar hugmyndir og ljáir málum aðra sýn. Eða eins og hann orðar það „ í stað þess að hugsa út fyrir kassann, hentu kassanum“
Fyrir þá sem hafa áhuga og kynna sér aðferðir hans betur þá set ég hér með „link“ á fyrirlestur sem hann hélt um þetta efni 2014.
www.youtube.com/watch?v=e51UzWBpGR0
Góða helgi :-)
Sigrún Stefánsdóttir
Forstöðumaður
Hrafnistu í Reykjavík