Á ársfundi Landspítala á dögunum flutti heilbrigðisráðherra ávarp. Þar boðaði hann byggingu á 500 nýjum hjúkrunarrýmum á næstu 5 árum eða svo, þar sem þungamiðjan yrði á höfuðborgarsvæðinu. Þetta er samkvæmt áætlun sem hann hyggst kynna á miðju ári.

Þessi tilkynning kemur í beinu framhaldi af gagnrýni spítalans á „sóun“ á almannafé með því að hafa eldra fólk með færni- og heilsumat fast inn á spítölunum. Stjórnendur spítalans eru þarna að benda á, að með því að byggja ekki hjúkrunarrými í samræmi við þörf og fjölgun aldraðra, séu sífellt fleiri aldraðir inn á spítalanum sem þurfi ekki að vera þar – þeir séu hins vegar það veikir að þeir komist ekki heim heldur verði bara að bíða eftirað það losni hjúkrunarrými. Þar sem það er miklu dýrara fyrir samfélagið að hafa aðila inn á spítala frekar en hjúkrunarheimili sé samfélagið að „sóa“ milljörðum króna á hverju ári vegna þessa ómarkvissa skipulags. Þar að auki komist ýmsir sem þurfa á spítalaþjónustu að halda ekki að þar sem rúmin séu “upptekin.”

Hrafnista hefur verið notuð sem dæmi um aðila sem gæti séð um aldraðra á töluvert ódýrari hátt en spítalinn er að gera.

Því miður fara stjórnendur LSH aðeins ónákvæmt með tölur í þessum fréttum. Það er hins vegar ekki að trufla skilaboðin frá þeim en verið er að benda á samfélagslegan kostnað við að hafa gamalt fólk með færni – og heilsumat fast inn á spítala fyrir 80-120þús á dag eða á hjúkrunarheimili fyrir 25 þús á dag. Við á Hrafnistu, rétt eins og önnur hjúkrunarheimli, eru rekin á daggjöldum sem skömmtuð eru af ríkinu. Við erum því ekkert að undirbjóða spítalann eða önnur hjúkrunarheimili, eins og einhverjar sögur segja sem farnar eru að stað. Hrafnista er nú bara notuð sem dæmi en það gæti alveg eins verið sagt „hjúkrunarheimili.“

Engur að síður vekur þessi umræða um að stækkun á Hrafnistu Kópavogi geti farið í gang fljótlega og ekki síður að framkvæmdir á svæði okkar við Sléttuveg í Reykjavík geti hafist, en þar ætlum við að reisa þjónustumiðstöð fyrir aldraða, 88 rýma hjúkrunarheimili og um 100 leiguíbúðir fyrir aldraða.

 

Á þriðjudaginn fór fram Aðalfundur Sjómannadagsráðs. Fundurinn gekk nú ljómandi vel fyrir sig. Þar bara helst til tíðinda að Hálfdan Henrysson var endurkjörin varaformaður stjórnar og Guðjón Ármann Einarsson var endurkjörinn féhirðir. Við óskum þeim félögum til hamingju með endurkjörið.

Einnig var farið ítarlega yfir niðurstöður úr stefnumótunarvinnu sem Sjómannadagsráð fór í, í samrvinnu við ráðgjafafyrirtækið Expectus.

Nokkrir fundarmenn tóku til máls og hrósuðu starfsfólki og stjórnendum Hrafnistuheimilanna mikið fyrir velunnin störf í erfiðu ástandi. Ég var beðinn að koma þessu til skila til starfsfólks sem ég geri hér með, með ánægju!

 

Að lokum er gaman að segja frá því að varla er tekin upp sjónvarpasþáttur á Íslandi lengur án þess að Hrafnista komi við sögu. Það er auðvitað bara mjög gaman því oft mikil þessum tökum mikið líf og tilbreyting auk þess sem stundum fá einhverjir heimilismenn okkar aukahlutverk. Hraðfréttir hafa til dæmis verið tíðir gestir á Hrafnistu í Hafnarfirði í vetur.

Nýlega hóf RÚV sýningar á nýjum gamanþáttum sem nefnast Drekasvæðið. Atriði í þáttunum er bæði tekin á Hrafnistu í Reykjavík og Hrafnistu Nesvölllum.

 

Góða helgi!

Pétur