Hinn 27. október næstkomandi er Alþjóðlegur dagur iðjuþjálfunar, í tilefni af því ætla ég að koma að fáeinum punktum varðandi iðjuþjálfun.

Iðjuþjálfun er faggrein sem fer vaxandi á heimsvísu og starfsvettvangur iðjuþjálfa er afar margbreytilegur. Iðja er allt sem einstaklingar taka sér fyrir hendur daglega s.s. að koma sér á fætur, annast sig og sína, stunda atvinnu og/eða tómstundaiðju og að sinna hlutverkum sínum varðandi fjölskyldu, vináttu og þátttöku í hverskonar félagsstarfi.

Iðjuþjálfar starfa með fólki á öllum aldri sem af ýmsum ástæðum glíma við iðjuvanda. Sumir verða fyrir skerðingu á færni með sjúkdómum, áföllum og hækkandi aldri. Iðjuvandi getur komið upp þegar samspil einstaklings, iðju og umhverfis hefur raskast og kallar á aðlögun á umhverfi, iðju, samskiptum og aðstæðum til að leysa úr iðjuvanda. Markmið iðjuþjálfa er að efla iðju, heilsu, færni og lífsgæði einstaklinga og starfa með þeim í að yfirstíga hindranir við þátttöku í iðju í víðasta samhengi.

Flutningi á hjúkrunarheimili fylgja miklar breytingar á lífi fólks. Möguleikinn á að sinna iðju sem hefur merkingu og tilgang og skiptir einstaklinginn máli getur verið mikilvægur stuðningur við að aðlagast breytingunum. Hvatning til þátttöku í hópastarfi og fylgd á viðburði í húsinu er áríðandi og getur stuðlað að nýjum kynnum og ný hlutverk skapast með þátttöku í hópum og klúbbum. Nú er lag að nýta það svigrúm til samveru sem skapast hefur með tilslökun á sóttvarnarreglum.

Öll erum við einstök og þátttaka einstaklings þarf að vera í samræmi við óskir hans, vilja og getu. Miklu máli skiptir í þessu samhengi að þekkja lífssögu og bakgrunn þeirra sem farnir eru að gleyma. Að njóta samveru, geta spjallað um heima og geima, virðing og áhugi á manneskjunni eru eiginleikar sem nýtast öllum vel og ekki er úr vegi að rifja upp sígildan sannleik úr einræðum Starkaðar eftir skáldið Einar Ben:

Eitt bros getur dimmu í dagsljós breytt,

sem dropi breytir veig heillar skálar.

Þel getur snúist við atorð eitt.

Aðgát skal höfð í nærveru sálar.

Að því sögðu hvet ég lesendur til að njóta augnabliksins, huga vel að eigin heilsu, gæta að jafnvægi í daglegu lífi og rækta tengsl við fjölskyldu og vini. Fara út í náttúruna, hreyfa sig og dást að litadýrð haustsins. Þó að birti þegar við brosum breitt skríður skammdegið að svo ekki gleyma endurskinsmerkjunum á útivistarfatnað og ljósabúnaði á hjól þegar verið er að viðra sig í rökkrinu.

Góðar stundir.

Inga Guðrún Sveinsdóttir

Deildarstjóri iðjuþjálfunar

Hrafnistu við Laugarás