Fréttasafn

Föstudagsmolar 18. september 2015 - Pétur Magnússon forstjóri

Hlutfallslega fæstir eldir borgarar á Völlunum en flestir eru í Laugardalnum!

Hagstofan gaf nýlega út hagtíðindi þar sem fjallað er um þá sem voru 65 ára eða eldri í manntalinu sem stofnunin gerið 31. desember 2011. Þar er að finna fróðlegar og tölulegar staðreyndir um þennan aldurshóp af ýmsu tagi.

Skýrsluna má finna á heimasíðu Hagstofunnar á eftirfarandi slóð: https://hagstofa.is/lisalib/getfile.aspx?ItemID=17870

Hér er smá dæmi úr skýrslunni:

Alls búa 64,1% alls mannfjöldans á höfuðborgarsvæðinu, en 35,9% utan þess. Hjá eldri borgurum landsins er þetta hlutfall örlítið annað. Í þeim hópi búa 61,8% á höfuðborgarsvæðinu en 38,2% á landsbyggðinni. Elsti hópurinn, 85 ára og eldri skiptist þó milli höfuðborgarsvæðisins og landsbyggðarinnar í svipuðum hlutföllum og landsmenn allir (65,7% og 35,3%). Alls eru eldri borgarar um 12,8% mannfjöldans á landinu öllu. Á höfuðborgarsvæðinu er hlutfallið 12,4% en 13,5% utan þess. Lægst er hlutfallið á talningarsvæðinu Völlum í Hafnarfirði (3,5%) en hlutfallslega flestir eldri borgarar búa í Laugardal austur í Reykjavík, þar sem 20,6% íbúanna eru 65 ára eða eldri.

Margt mjög fróðlegt má lesa í þessari skýrslu og nú komast tölu-grúskarar í feitan bita 

 

Fundað með Félagi íslenskra hjúkrunarfræðinga um fagleg málefni

Í vikunni komu fulltrúar Félags íslenskra hjúkrunarfræðinga (Fíh) í heimsókn á Hrafnistu. Þeir áttu fund með okkur í framkvæmdaráði og fór fundurinn fram á Hrafnistu Hafnarfirði. Tilgangurinn var að ræða öldrunarhjúkrun á faglegum nótum en ekki kjaramál. Á fundinum sem var mjög óformlegur var farið um víðan völl í öldrunarhjúkrun, bæði á Hrafnistu og annars staðar. Meðal annars rætt um mönnunarmódel, fjármögnun þjónustunnar, kjörár hjúkrunarfræðinga á Hrafnistu, þjónustu við dvalarrými og hjúkrunarrými, RAI-mat og ýmislegt fleira.

Þetta var mjög skemmtilegur og gagnlegur fundur og var ákveðið að Fulltrúar Fíh og Hrafnistu myndu reyna að hittast árlega til að reifa ýmis fagleg mál og bera saman bækur sínar.

Gaman er líka að segja frá því að María Fjóla, framkvæmdastjóri heilbrigðissviðs, er nýlega kominn inn í stjórn Fagdeildar öldrunarhjúkrunarfræðinga.

 

Haustfagnaðir á Hrafnistu

Það er aldrei lognmolla á Hrafnistu og nú þegar haustið er komið, þá er tími haustfagnaðanna runnin upp. Hrafnista Reykjavík reið á vaðið í gærkvöldi þar sem glæsilegur haustfagnaður heimilisfólks fór fram og tókst hann vel. Söngvararnir Davíð Ólafsson og Stefán Stefánsson voru veislustjórar og skemmtu með söng og glensi. Að loknu borðhaldi tók svo við ball með Guðmundi Hauki Jónssyni.

Haustfagnaðir á hinum heimilum okkar verða sem hér segir.

Fimmtudagur 24. september- Hrafnista HAFNARFJÖRÐUR

Fimmtudagur 8. október - Hrafnista HLÉVANGUR

Fimmtudagur 15. októeber - Hrafnista KÓPAVOGUR

Fimmtudagur 22. október - Hrafnista NESVELLIR

Dagskrá haustfagnaðanna verður svo auglýst hér betur á heimasíðunni. Góða skemmtun!

 

Glæsileg ferð í Kerlingarfjöll

Að lokum langar mig að fá að þakka stjórn og skemmtinefnd starfmannafélagsins okkar í Reykjavík fyrir flotta ferð í Kerlingarfjöll um síðustu helgi. Þá fór vaskur hópur starfsfólks frá Hrafnistu Reykjavík ásamt mökum í mjög skemmtilega ferð í Kerlingarfjöll. Þar var blíðskaparverður og fólk gat valið sér fallegar gönguferðir við hæfi. Síðan var auðvitað grill og glens fram eftir kvöldi. Allt eins og best verður á kosið. Ég þakka ferðafélögum kærlega fyrir samveruna og sendi þakklætiskveðjur til stjórnar og skemmtinefndar starfsmannafélagsins.

 

Góða og gleðilega helgi!

Pétur

Hrafnista Hafnarfirði - Þorgerður M. Gísladóttir, stofnandi Fimleikafélagsins Bjarkar, heiðruð á 90 ára afmælisdaginn

Miðvikudaginn 9. september sl. fagnaði Þorgerður M. Gísladóttir, stofnandi Fimleikafélagsins Bjarkar 90 ára afmæli sínu. Hún og eiginmaður hennar, Jón Ólafur Bjarnason, áttu einnig 63 ára brúðkaupsafmæli þann dag.

Fulltrúar frá Fimleikafélaginu Björk birtust óvænt til að fagna afmælinu hennar og var hún heiðruð. Í tilefni dagsins tilkynntu fulltrúarnir henni að framvegis verður haldinn Þorgerðardagur árlega að hausti henni til heiðurs.

Sjá nánar frétt í Fjarðarpóstinum á bls. 14  http://www.fjardarposturinn.is/images/FP-pdf/FP-2015-32-skjar.pdf

 

Föstudagsmolar 11. september 2015 - Pétur Magnússon forstjóri

Hrönn og Bjarney stýra Reykjanesbæ og Kópavogi í að minnsta kosti eitt ár í viðbót!

Nú er liðið eitt og hálft ár síðan Hrafnista hóf starfsemi í Reykjanesbæ. Tíminn hefur liðið mjög hratt eins og yfirleitt gerist þegar það er gaman. Eins og einhver ykkar sjálfsagt muna, hefur Hrönn Ljótsdóttir, forstöðumaður í Reykjanesbæ, verið í tveggja ára leyfi frá Hrafnistu Kópavogi, til að sinna málefnum Reykjanesbæjar. Það hefur hún gert af miklum sóma.

Nú hefur verið ákveðið að framlengja leyfi hennar um eitt ár í viðbót þannig að Hrönn mun áfram gegna störfum forstöðumanns Hrafnistu í Reykjanesbæ, að minnsta kosti til febrúar 2017. Jafnframt hafa Bjarney Sigurðardóttir, sem nú starfar sem forstöðumaður í Kópavogi og Rebekka Ingadóttir, deildarstjóri í Kópavogi, samþykkt að vera áfram í störfum sínum þar, að minnsta kosti út þennan sama tíma.

Kærar þakkir fyrir það.

 

Hvað er Hrafnista margir fermetrar?

Öðru hverju kemur upp umræða um stærð og umfang starfsemi Hrafnistuheimilanna. Nánast undantekningalaust er fólk sem hlustar á kynningar og fróðleik um Hrafnistu, mjög hissa á hversu mikið og öflugt starf fer fram á okkar vegum. Ég hef stundum í þessum pistli mínum sett inn upplýsingar um ýmsa þætti starfseminnar.

Til fróðleiks fylgja hér tölur um stærðir húsnæðis okkar á Hrafnistu í Reykjavík og Hrafnistu Hafnarfirði en þessi tvö húsnæði eru alfarið í eigu okkar (Sjómannadagsráðs).

Starfsemi Hrafnistu Reykjavík fer fram í húsnæði sem er að heildarstærð 15.585 m2. Allt húsnæðið var byggt í mörgum minni áföngum, en þorri þess var tekið í notkun á tímabilinu 1957 til 1965. Allt það húsnæði var byggt fyrir fé sem félagið aflaði með ýmsum hætti, þ.a.m. með gjöfum, rekstri kvikmyndahúss, merkjasölu, tekjum af sjómannadeginum, styrkjum frá einstaklingum og fyrirtækjum og gjöfum sem félaginu barst á þessu tímabili og fleira. Nýjasti hluti húsnæðisins er H-álman sem tekin var í notkun árið 2003. Hún er um 3.825 m2 að stærð. Það húsnæði var byggt fyrir fé sem félagið aflaði sjálft, lánum sem tekin voru af því tilefni og félagið er enn að borga af og síðan einnig með stuðningi frá Reykjavíkurborg og ríkinu.

Starfsemi Hrafnistu Hafnarfirði fer fram í húsnæði sem er að heildarstærð 14.320 m2. Húsnæðið var byggt í tveimur áföngum og tekið í notkun á árunum 1978 og 1982. Byggingarkostnaður var fjármagnaður með fé sem félagið aflaði sjálft, s.s. eins og með gjöfum, rekstri kvikmyndahúss, styrkjum frá líknarfélögum, einstaklingum og fyrirtækjum og einnig með gjöfum sem félaginu barst á þessu tímabili.

Við þetta má svo bæta að ákvörðun um byggingu hjúkrunarheimilis var tekin af Sjómannadagsráði árið 1939 og hófst fjáröflun árið 1942. Þá fóru einstaklingar og fyrirtæki að gefa fjárupphæðir sem voru ígildi eins herbergis. Ekki hvað síst skipti það Sjómannadagsráð miklu máli að lög voru sett á Alþingi árið 1954 sem veittu heimild til reksturs Happdrættis dvalarheimilisins aldraðra sjómanna, þar sem skilyrt er að allur ágóði þess renni til uppbyggingar Hrafnistuheimilisins í Reykjavík og síðar Hrafnistu i Hafnarfirði. Það má því ekki gleyma mikilvægi Happdrættis DAS í þeirri merku sögu að gera Hrafnistuheimilin að veruleika.

Starfsafmæli á Hrafnistu í september

Í september eiga formlegt starfsafmæli nokkrir valinkunnir starfsmenn okkar hér á Hrafnistu. Þetta eru:

3 ára starfsafmæli: Í Reykjavík eru það Lilja Rut Ólafsdóttir á Mánateig og Ása Jónsdóttir í dagþjálfun. Í Hafnarfirði eru það Harpa Björgvinsdóttir iðjuþjálfi, Maya Marinova í borðsal og Rakel Steinsen á Ölduhrauni. Einnig Stefanía Ólöf Hafsteinsdóttir í Kópavogi.

5 ára starfsafmæli: Thelma Þorsteinsdóttir í Kópavogi, Sigríður Ingólfsdóttir í borðsal og Lilian Harpa Ragnarsdóttir á Bylgjuhrauni, báðar í Hafnarfirði og Jozefa Biermann á Miklatorgi í Reykjavík.

10 ára starfsafmæli eiga Dagný Jónsdóttir á Sólteigi í Reykjavík og Jónas Hilmarsson í Umsjón fasteigna.

15 ára starfsafmæli eiga Lourdes Dygay Yanos á Lækjartorgi og Gunnhildur Björgvinsdóttir deildarstjóri Sólteigs, báðar í Reykjavík.

Hjartanlega til hamingju öll og kærar þakkir fyrir góð störf og tryggðina við Hrafnistu.

 

Nú er ég farinn í réttir og segi góða helgi!

Pétur

 

Hrafnista og Kópavogsbær framlengja samstarfi í Boðanum

Fv. Pétur Magnússon, Bjarney Sigurðardóttir, Guðmundur Hallvarðsson, Ármann Kr. Ólafsson og Theódóra S. Þorsteinsdóttir.
Lesa meira...

Nýlega undirrituðu fulltrúar Hrafnistu og Kópavogsbæjar nýjan samning um áframhaldandi samstarf aðilanna í félagsmiðstöðinni Boðanum við Boðaþing í Kópavogi. Hrafnista og Sjómannadagsráð, eigandi Hrafnistuheimilanna, hafa átt í farsælu samstarfi í Boðaþinginu en árið 2010 opnaði þar hjúkrunarheimili sem Hrafnista rekur. Það er sambyggt félags- og þjónustumiðstöð á vegum Kópavogsbæjar sem hóf starfsemi sama ár. Í félags- og þjónustumiðstöðinni er meðal annars að finna fjölbreytt félagsstarf, matsal, dagdvöl fyrir aldraða, sundlaug, hárgreiðslustofu, fótsnyrtistofu og sjúkraþálfun.

Meðfylgjandi mynd var tekin við undirritunina. Frá vinstri: Pétur Magnússon forstjóri Hrafnistu, Bjarney Sigurðardóttir forstöðumaður Hrafnistu Kópavogi, Guðmundur Hallvarðsson stjórnarformaður Sjómannadagsráðs og Hrafnistu, Ármann Kr. Ólafsson bæjarstjóri Kópavogs og Theódóra S. Þorsteinsdóttir formaður bæjarráðs Kópavogsbæjar.

Nýr fótaaðgerðafræðingur á Hrafnistu í Reykjavík

Málmfríður Einarsdóttir, fótaaðgerðarfræðingur, hefur hafið störf á Hrafnistu í Reykjavík.

 

Opnunartímar:

Mánudaga kl. 9.00 - 16.00

Fimmtudaga kl. 9.00 - 16.00

Föstudaga kl. 9.00 - 16.00

Tímapantanir í síma 585 9471

Föstudagsmolar 4. september 2015 - Pétur Magnússon forstjóri

Að trúa á það jákvæða!

Mest umtala atriðið á kaffistofum landsins í dag er án efa knattspyrnulandsleikur Hollendinga og Íslendinga sem fram fór í gærkvöldi. Þar báru okkar menn sigurorð af bronsliði síðustu heimsmeistarakeppni á þeirra eigin heimavelli.

Árangur liðsins okkar er ekki lengur nein tilviljun eða heppni. Þarna eru einfaldlega á ferðinni menn (piltar) sem með ótrúlegri þolinmæði, samvinnu, jákvæðni og óbilandi trú á sjálfum sér, eru búnir að koma sér í fremstu röð í vinsælustu íþrótt í heimi.

Stjórnun og starfsemi fyrirtækja og stofnanna má oft líkja við íþróttalið og er í raun þar mjög margt sameiginlegt. Þar sem menn vinna vel saman og hafa trú og jákvæðni að leiðarljósi við að takast á við verkefnin sem þarf að leysa, er hægt að framkvæma ótrúlegustu hluti og ná undraverðum árangri.

Það verður gaman að fylgjast með knattspyrnulandsliðinu okkar á næstunni. Auk þess að vera dugleg við að gleðjast með fótboltaliðinu okkar, getum við hér á Hrafnistu líka lært margt af þeim.

 

Fjölgun aldraðra

Fjölgun aldraðra í íslensku samfélagi á næstu árum hefur verið töluvert til umfjöllunar undanfarin misseri, sérstaklega í hópi okkar sem störfum að velferðar- og heilbrigðismálum. Til fróðleiks eru hér nokkrar tölur sem unnar eru úr mannfjöldaspá hagstofunnar. Íslendingar, 67 ára og eldri, eru í dag rúmlega 36þúsund eða 11,2% þjóðarinnar. Strax árið 2020 verður þessi aldurshópur kominn í 45þúsund manns eða 13%. Fjölgun aldraðra stigmagnast svo til ársins 2050 en þá verða aldraðir yfir 21% þjóðarinnar (um 88þúsund).

Þó margir kalli fjölgunina stórt vandamál vil ég ferkar horfa á þetta sem skemmtilegt viðfangsefni sem verður verðugt og gaman að fá að taka þátt í að glíma við.

 

Sumarhúsin í Hraunborgum

Mig langar að nota þetta tækifæri og minna ykkur á sumarhúsin fyrir starfsfólk Hrafnistuheimilanna í Hraunborgum í Grímsnesi. Tvö orlofshús í Hraunborgum verða leigð til starfsmanna Hrafnistu í vetur og er helgarleigan 10.000.- kr.

Orlofshúsin okkar þar eru reyndar aðeins að byrja vera gömul en hefur verið haldið ágætlega við. Þar er að finna öll helstu þægindi eins og sjónvarp, gasgrill og heitan pott.

Fyrir þá sem ekki þekkja til í Hraunborgum, sem eru í um rúmlega klukkustundar akstursfjarlægt frá höfuðborgarsvæðinu, má geta þess að þar er sérlega gott útivistarsvæði, bæði fyrir börn og fullorðna. Á svæðinu er m.a. minigolf, sparkvöllur, hjólaleiga, níu holu golfvöllur, leiktæki fyrir börn og útsýnisskífa þar sem hægt er að sjá hvernig landið liggur og læra helstu örnefni nágrennisins.

Öllum starfsmönnum er velkomið að sækja um og er farið eftir reglunni “fyrstur kemur, fyrstur fær”. Vinsamlega sækið um orlofshúsin á heimasíðu Hrafnistu, hrafnista.is.

 

Starfsafmæli í ágúst

Nú í ágúst fögnuðu formlegu starfsafmæli eftirfarandi starfsmenn okkar hér á Hrafnistu:

3 ára starfsafmæli: Í Reykjavík eru það Þorgerður Kr Guðmundsdóttir, Inga Guðrún Sveinsdóttirog Sigurlaug Díana Kristjánsdóttir, allar í iðjuþjálfun og félagsstarfi. Í Hafnarfirði eru það Tanja Kristóbertsdóttir á Báruhrauni og Ragnheiður Gunnarsdóttir hjúkrunarfræðingur. Einnig Erla Ólafsdóttir deildarstjóri sjúkraþjálfunar í Kópavogi.

5 ára starfsafmæli: Nanna Guðný Sigurðardóttir gæðastjóri, Tómas Þór Jacobsen í borðsal í Hafnarfirði og Maribeth Encarquez Ycot í Kópavogi.

10 ára starfsafmæli: Hanna Gunnlaugsdóttir í eldhúsi og Perla Thoa Kim Thai í borðsal, báðar í Reykjavík. Niu Jianying og Dagrún Magnúsdóttir á Öldruhrauni, báðar í Hafnarfirði.

15 ára starfsafmæi: Penka Krasteva Koylasova á Engey/Viðey í Reykjavík og Eygló Sævarsdóttir í eldhúsi í Hafnarfirði.

Hjartanlega til hamingju öll og kærar þakkir fyrir góð störf og tryggðina við Hrafnistu.

 

Góða helgi!

Pétur

 

Síða 115 af 121

Til baka takki