Ágæta samstarfsfólk á Hrafnistuheimilunum,

Á þessum stysta degi ársins vil ég óska ykkur og fjölskyldum ykkar gleðilegra jóla og farsældar á komandi ári. Ég vona að þið eigið öll ánægjulegar stundir um hátíðarnar í faðmi fjölskyldu og vina.

Jafnframt þakka ég ykkur kærlega fyrir ánægjulegt og árangursríkt samstarf á árinu sem er að líða sem var mikið merkisár í 61 árs sögu Hrafnistu.

Ég hlakka mikið til að takast á við árið 2019 með ykkur – þar sem verkefnið verður, rétt eins og áður, að gera mjög góða Hrafnistu ennþá betri!

Það eru forréttindi að fá að vinna með öllu því góða fólki sem starfar á Hrafnistu og gerir starfsemina okkar jafn glæsilega og raun ber vitni. Án góðs fólks væri Hrafnista ansi fátækleg og ekki þessi frábæri vinnustaður.

Á sama tíma getum við líka verið stolt af því leiðandi afli sem Hranfista er orðin í öldrunarmálum hér á landi.

Af mörgu skemmtilegu sem ég geri í vinnunni er vikan fyrir jól, jafnan ein sú allra skemmtilegasta. Þá fer ég í árlega jólaheimsókn um öll Hrafnistuheimilin sex en þetta er siður sem ég tók upp árið 2009. Þá set ég hefðbundna vinnu til hliðar í rúma 3 daga og reyni að heimsækja allar deildir, skrifstofur, ganga, kaffistofur, setustofur og aðrar einingar á öllum Hrafnistuheimilunum með „jólaálfa“ mér við hlið sem syngja og spila jólalög fyrir starfsfólk, íbúa og aðra gesti - og smá jólanammi fylgir með. Þau flytja 2-5 lög í hverju stoppi og hlustendur eru á bilinu 2-70 í hvert skipti. Í þessum heimsóknum flytja „jólaálfarnir“, örugglega samtals vel á annað hundrað lög (sömu 10-12 lögin sem rúlla) og þau standa sig hreint ótrúlega vel við að koma mér og öðrum í jólaskap.

Nú er ég að klára að komast „hringinn“ á öllum heimilum og var þetta að vanda mjög ánægjulegt verkefni.

Á morgun hækkar sól á lofti og daginn fer að lengja aftur.

Gleðilega hátíð!

Bestu kveðjur,

Pétur