Föstudagsmolar

FÖSTUDAGSMOLAR FORSTJÓRA

Föstudaginn 16. nóvember 2018.

Ágæta samstarfsfólk á Hrafnistuheimilunum,

Biðlisti eftir hjúkrunarrýmum aldrei verið lengri í Íslandssögunni!

Í vikunni var kynnt skýrsla frá Embætti landlæknis um biðlista eftir hjúkrunarrými hér á landi. Fram kemur að biðlistarnir hafa verið að lengjast jafnt og þétt á síðustu árum og núna í september biðu að meðaltali 411 einstaklingar eftir hjúkrunarrýmum. Í september í fyrra biðu að meðaltali 342 og nemur fjölgunin á landsvísu því um 20%. Einnig kemur fram að biðtími eftir hjúkrunarrýmum hefur einnig lengst umtalsvert á undanförnum árum. Á þriðja fjórðungi ársins 2018 var miðgildi biðtíma 83 dagar en til samanburðar var miðgildi 70 dagar á þriðja fjórðungi ársins 2017. Athygli vekur að í  starfsemisupplýsingum Landspítala kemur fram að 1. október síðastliðinn hafi 16% af rúmum á Landspítala (án öldrunardeildar á Vífilstöðum og líknardeildar) verið notuð af öldruðum með gilt færni- og heilsumt sem biðu úrræðis utan spítalans. Þörfin fyrir starfsemi Hrafnistu hefur því líklega sjaldan verið meiri en einmitt nú.

Fyrir áhugasama er skýrslu Embættis landlæknis að finna hér:

https://www.landlaeknir.is/um-embaettid/frettir/frett/item35781/bid-eftir-hjukrunarrymi

Glæsileg heilsuvika í Hafnarfirði

Í dag lauk heilsuviku hjá okkur í Hafnarfirði. Þá var skemmtileg heilsudagskrá í boði fyrir íbúa og starfsfólk sem meðal annars fólst í fræðslu á hverjum degi og boðið var upp á skemmtilega hreyfingu. Þetta tókst mjög vel og þáttaka var mjög góð.

Vil ég óska öllum sem komu að heilsuvikunni í Hafnarfirði hjartanlega til hamingju með framtakið!

Nýtt Hrafnistu-bréf að koma út!

Í næstu viku berst okkur í hús nýtt eintak að Hrafnistubréfinu. Eins og þið sjálfsagt þekkið kemur það út tvisvar á ári í um tvö þúsund eintökum. Auk þess að vera dreift til heimilismanna Hrafnistuheimilanna fer það um víðan völl í samfélaginu; til annara hjúkurnarheimila, alþingismanna, sveitarstjórnarfólks og fleiri. Blaðið verður með hefðbundnu sniði og bið ég ykkur að dreifa því fljótt og vel til heimilisfólks þegar það berst inn á deildir til ykkar. Sjálfsagt er líka að leyfa því að liggja frammi í öllum setustofum og annars staðar þar sem fólk kemur saman enda er þetta mikilvægur þáttur í að kynna okkar merkilega og glæsilega starf.

Ef ykkur vantar aukaeintök er ykkur velkomið að snúa ykkur til Huldu S. Helgadóttur.

Fundur Landssambands heilbrigðisstofnanna um framtíðarsýn á skipulag og veitingu heilbrigðisþjónustu

Í dag hélt Landsamband heilbrigðisstofnanna aðalfund sinn og málþing. Landssambandið er vettvangur framkvæmdastjórna stærstu heilbrgiðisstofnanna landsins til samskipta, umræðu og samráðs. Þar höfum við á Hrafnistu (eitt hjúkrunarheimila) verið virkir þátttakendur síðustu ár enda erum við ein allra stærsta heilbrigðisstofnun landins og öldrunarmálefnin vigta sífellt þyngra í starfi annarra heilbrigðisstofnanna. Í kjölfar stutts aðalfundar var málþingið Framtíðarsýn á skipulag og veiting heilbrigðisþjónustu á Íslandi. Þar voru frummælendur Svandís Svavarsdóttir, heilbrigðisráðherra, Alma D. Möller, landlæknir, María Heimisdóttir, forstjóri Sjúkratrygginga Íslands og Jón Steinar Jónsson yfirlæknir. Í pallborðsumræðum á eftir bættust svo við Bjarni Jónasson forstjóri Sak, Páll Matthíasson forstjóri LSH og undirritaður. Málþingið var fróðlegt og fjörugt en í svona umræðum er mikilvægt að sjónarhorn okkar í öldrunarþjónustunni heyrist hátt og skýrt.

Svo er bara að vona að það skili sér eitthvað...

Góða helgi!

Bestu kveðjur,

Pétur