Þann 2. maí sl. tók Hrafnista formlega við rekstri hjúkrunarheimilisins Skógarbæjar. Það er gaman að líta til baka yfir þetta hálfa ár og rifja upp hvað hefur breyst í starfseminni, hvar við stöndum og hvað hefur áunnist.
Á samningstímabilinu, sem er til að byrja með til ársloka 2020, verður Hrafnista Skógarbæ sjálfstæður hluti af rekstarsamstæðu Sjómannadagsráðs. Skógarbær er hjúkrunarheimili skammt frá Mjódd í Reykjavík, stofnsett árið 1997 og er því orðið 22 ára gamalt. Á heimilinu býr 81 íbúi á 6 deildum sem eru misstórar, allt frá 8 upp í 16 íbúar á deild. Hrafnista í Skógarbæ er sjöunda Hrafnistuheimilið og við erum ánægð með þessa tölu því hún er talin vera happatala!
Á heimilinu eru 11 rými fyrir íbúa sem eru yngri en 67 ára. Deildin var sett á laggirnar við opnun heimilisins en í dag búa þessir íbúar á þremur deildum á heimilinu. Í byrjun árs 2019 var ráðinn starfsmaður í hlutastarf til að aðstoða íbúa við að sinna áhugamálum sínum. Starfsmaðurinn og íbúar fara í göngutúra, á tónleika, í bíó eða á kaffihús. Mikil ánægja er á meðal starfsmanna, íbúa og ættingja með að þessi hópur íbúa hafi starfsmann sem sinnir þeim á þessu sviði enda er starfsemin á hjúkrunarheimilinu oftar sniðin fyrir hóp eldri íbúa. Þessi hópur yngri íbúa er kannski ekki hrifinn af harmonikkutónlist og gellum í matinn, heldur kýs frekar að fara á tónleika með Skálmöld og fá sér hamborgara í kvöldmat.
Helstu verkefni síðan Hrafnista tók við daglegum rekstri hafa verið gæðamál og það sem snýr að þeim. Við höfum innleitt gæðahandbók Hrafnistu og hluta þeirra verklagsreglna sem þar eru. Gæðareglur er snúa að lyfjamálum, öryggismálum, móttöku nýrra íbúa, móttöku nýrra starfsmanna svo eitthvað sé nefnt hafa þú þegar verið innleiddar á heimilið. Þessi vinna hefur gengið vel og innleiðing á öðrum verklagsreglum í fullum gangi.
Starfsmenn Skógarbæjar hafa tekið vel á móti okkur á Hrafnistu og við finnum að fólk er jákvætt og er tilbúið að vera þátttakendur í uppbyggingu á innra starfi heimilisins. Það ríkir mikil gleði á heimilinu. Hlátur, söngur og gleði endurspeglar starfsemina og heimilisandann. Söngurinn kemur ekki aðeins frá íbúum og starfsmönnum heldur sér Sóley, páfagaukurinn okkar sem flutti inn í sumar, um að gleðja okkur með söng og dansi dags daglega.
Við á Hrafnistu Skógarbæ hlökkum til að halda áfram að rækta það góða starf sem er unnið á heimilinu og óskum þess að lukkutalan 7 muni fylgja okkur í lífi og starfi.
Rebekka Ingadóttir
Forstöðumaður Hrafnistu Skógarbæ