Á Hrafnistu í Kópavogi eru 4 deildar með 11 heimilismönnum hver. Til að draga úr stofnanayfirbragði klæðast starfsmenn ekki einkennisfatnaði. Þá eru hjálpartæki, aðhlynningavagnar og körfur undir óhreint tau að öllu jöfnu staðsett á herbergjum heimilismanna til að yfirbragð deildarinnar, hins sameiginlega rýmis, sé sem heimilislegast. Hjarta hverrar deildar eru eldhúsið og borðstofan, þar sem íbúar og starfsmenn borða saman við stórt borðstofuborð, rétt eins og á venjulegu heimili. Eldhúsin eru opin og öllum heimill þar aðgangur. Morgunmatur er ekki á fyrirfram ákveðnum tíma, heldur getur verið á tímabilinu frá klukkan sex til ellefu. Þó að hádegismaturinn komi tilbúinn frá eldhúsi Hrafnistu í Reykjavík, er hann borinn fram á fötum þannig að hver og einn geti fengið sér að borða í samræmi við eigin óskir. Á kvöldin nokkrum sinnum í viku er eldaður einfaldur matur og þá gjarnan í samráði við heimilismenn.

Hvert einkarými er um 35 fermetrar. Það samanstendur af sameiginlegu svefnherbergi og stofu auk baðherbergis og eldhúskrók, þar sem er innrétting með ísskáp og vaski. Tveir gluggar eru í hverju herbergi, annar stór og hinn minni, og eru herbergin því bæði björt og afar skemmtileg. Til að gera herbergin sem heimilislegust kemur heimilisfólk með eigin gardínur, eigin rúmföt og handklæði. Margir möguleikar eru á uppröðun húsgagna í herbergjunum og eru t.d. fataskápar á hjólum þannig að unnt sé að færa þá til tilbreytingar. Á hverri deild eru þrjú herbergi sem unnt er að opna á milli til að gera hjónum kleift að búa í samliggjandi herbergjum. Þvottahús eru á hverri deild.

Hugmyndafræði Lev og bo kemur fram í mörgum þáttum í hönnun húsnæðisins í Kópavogi, hún birtist m.a. í því að stoðeiningar heimilisins, s.s. starfsmannaaðstaða, aðstaða fyrir félagsstarf, dagvistun, iðjuþjálfun og endurhæfingu ásamt ýmsu fleiru í starfsemi hjúkrunarheimila, eru ekki staðsettar á sjálfu heimilinu, heldur í  þjónustumiðstöð sem er í sérbyggingu samtengdri húsnæði Hrafnistu.

Á Hrafnistu í Kópavog er ekki mikið um fyrirfram ákveðna dagskrá í félagslífi frekar en á venjulegu heimili, en þó er að jafnaði ein uppákoma á dag, t.d. tálgun, harmonikuspil, botsja, gönguferðir, böll og helgistundir.